Ազատամարտիկը ձերբակալվել է 2000 ԱՄՆ դոլար հափշտակելու մեղադրանքով

Երեկ երեկոյան` ժամը 10-ի մոտ քաղաքացիական հագուստով 4 անձինք, առանց ներկայանալու և որևէ պարզաբանման ձերբակալել են ազատամարտիկ Վոլոդյա Ավետիսյանին, որին այսօր ՊՆ քննչական ծառայությունից տեղափոխել են «Էրեբունի» ՁՊՎ: Վոլոդյա Ավետիսյանն Ազատության հրապարակում նստացույց հայտարարած և ազատամարտիկների սոցիալական խնդիրներին լուծում պահանջող ազատամարտիկներից` պահանջելով բարելավել ազատամարտիկների սոցիալական վիճակը: Ազատամարտիկը վերջին ամիսներին իրազեկող նստացույցեր էր անցկացնում նաև Հայաստանի մարզերում` ազատամարտիկներին համախմբվելու կոչեր անելով:

Lurer.com-ը փորձեց պարզաբանումներ ստանալ ՀՀ ոստիկանության հասարակայնության հետ կապերի և լրատվության բաժնի պետ Արմեն Մալխասյանից: Մեր լրագրողի հարցին, թե ինչու են ձերբակալել ազատամարտիկ Վոլոդյա Ավետիսյանին, լրատվության բաժնի պետը ասաց, որ պետք է տեղեկատվությունը ճշտել Ռազմական ոստիկանությունից կամ Պաշտպանության նախարարությունից:

Ռազմական ոստիկանությունից մեզ պատասխանեցին, որ իրենք լրատվության բաժին չունեն և չեն կարող տեղեկություններ տրամադրել:

Քիչ անց ՀՀ ՊՆ քննչական ծառայությունը հայտարարություն տարածեց, որ ՀՀ ՊՆ քննչական ծառայությունում քննվող քրեական գործի նախաքննության ընթացքում ձեռնարկված օպերատիվ-հետախուզական միջոցառումների արդյունքում՝ ՀՀ քր. օր-ի 178 հոդ. 2-րդ մասի 2-րդ կետով նախատեսված հանցագործություն կատարելու կասկածանքով (խարդախություն՝ խոշոր չափերով) 20.09.2013թ. ձերբակալվել է պահեստազորի գնդապետ Վոլոդյա Արտուշի Ավետիսյանը:

Վ.Ավետիսյանը, խաբեության և վստահությունը չարաշահելու եղանակով քաղ. Հ. Զաքարյանի թոռանը պարտադիր ժամկետային զինվորական ծառայությունից ազատելու հարցում աջակցություն ցույց տալու պատրվակով, Հ. Զաքարյանից հափշտակել է 2000 ԱՄՆ դոլար գումար:

Քրեական գործի նախաքննությունը շարունակվում է:

Վարուժան Բաբաջանյան