Ինչպիսին են Հայաստանի նախագահների բնավորության գծերը. բացահայտում է հոգեբանը (ֆոտո)

Հայաստանի երեք նախագահներն իրենց բնավորությամբ ու հոգեբանությամբ շատ տարբեր են: Հոգեբանական գիտությունների թեկնածու, դոցենտ Ռուբեն Պողոսյանը Slaq.am-ի խնդրանքով վերլուծեց Հայաստանի երեք նախագահների հոգեբանությունը:

Հոգեբանի խոսքերով` Հայաստանի առաջին նախագահ Լևոն Տեր-Պետրոսյանն իր բնույթով չափից դուրս փակ է, ինքնամփոփ, հավատարիմ է մնում իր սկզբունքներին, այսինքն' դժվարությամբ է ընդունում իր սխալները: Որպես անհատ' մարդասեր է, սակայն որպես քաղաքական գործիչ' իրեն հեռու է պահում ժողովրդից: 

Նա դժվարությամբ է ընդունում իր սխալները, շրջապատին շուտ է սկսում վստահել. «Իր համախոհների շրջանակում նա դժվարությամբ է կողմնորոշվում, թե արդյոք նրանք կկարողանան այդ գործը կատարել, թե ոչ: Նա կարող է իր համախոհներին պաշտոն տալ, և երբեք չընդունել, որ նրանք իրեն կարող են դավաճանել: Եթե նա տեսնում է, որ իր հանդեպ դրական են տրամադրված, սկսում է ամբողջությամբ վստահել ու ընկերասիրության մեջ լինել հավատարիմ: Նա երբեք չի ընդունում, որ մարդկանց հարցում կարող է սխալվել»,- այդպես է բնորոշում ՀՀ առաջին նախագահին Ռուբեն Պողոսյանը:

Ինչ վերաբերվում է ՀՀ երկրորդ նախագահ Ռոբերտ Քոչարյանին, ապա նա, ի տարբերություն առաջին նախագահի, դժվարությամբ է վստահում մարդկանց:

«Քոչարյանի մոտ մարդկանց հանդեպ վստահության խորը պակաս կա: Նա տուրք է տալիս ոչ թե սկզբունքներին, այլ այն համոզմունքներին, որոնք անանց են իր համար, այսինքն' որոնք նա օբյեկտիվ է տեսնում, սակայն դրանք անփոփոխ ձևով խիստ սուբյեկտվիվ են դառնում»,- նշում է հոգեբանը:

Որպես անձ Ռոբերտ Քոչարյանը, հոգեբանի բնորոշմամբ, չունի իր սխալներն ուղղելու ցանկություն: Նա միշտ պատրաստ է հակահարվածի:

ՀՀ երրորդ և գործող նախագահ Սերժ Սարգսյանն իր մարդկային հատկանիշներով ավելի առաջ է ընկած նախորդ երկուսից: Նա շատ ավելի մարդակային ու մարդամոտ է, սակայն ցավոք սրտի, կենցաղին ավելի է վստահում, քան իրեն շրջապատողներին:

«Նա կարող է օգնության ձեռք մեկնել սովորական մարդուն, քան մտածողությամբ լինել վերևներում: Սերժ Սարգսյանը մեծ կախում ունի իր շրջապատից: Չի կարելի ասել, որ նա վստահում է իր շրջապատին, այլ նա պարզապես ցանկանում է, որ իրեն ընդունեն»,- ՀՀ երրորդ նախագահին այսպես է բնորոշում հոգեբանը: