18 պարի համույթներ՝ Շիրակի մարզային պարի փառատոնին

Սեպտեմբերի 21-ին Գյումրու Վ. Աճեմյանի անվան պետական դրամատիկական թատրոնում անցկացվեց Շիրակի մարզի պարի փառատոն՝ նվիրված ՀՀ անկախության 22-րդ տարեդարձին։ Այն կազմակերպել էր Հայաստանի երիտասարդական հիմնադրամի Շիրակի մարզային կենտրոնը։ Պարի փառատոնին մասնակցում էին ոչ միայն Գյումրու, այլև մարզի տարբեր համայնքների (Աշոցք, Մարալիկ, Ախուրյան, Արթիկ, Ամասիա) 18 պարային խմբեր։

Հայաստանի երիտասարդական հիմնադրամի Շիրակի մարզային կենտրոնի համակարգող Վահե Թագվորյանը տեղեկացրեց, որ պարային խմբերը մասնակցել են նախընտրական փուլի, և Շիրակի մարզի ավելի քան 30 պարային համույթներից ժյուրիի ընտրությամբ փառատոնին մասնակցելու իրավունք են ստացել 18-ը։ Վահե Թագվորյանի խոսքով՝ փառատոնի նպատակն է ակտիվացնել մարզի պարային խմբերին, սերտացնել համագործակցությունը պարային համույթների միջև, հանրության շրջանում տարածել ազգային պարը։

Վանուշ Խանամիրյանի անվան Գյումրու «Վարդևանյան» պարի թատրոնի գեղարվեստական ղեկավար Հովհաննես Վարդևանյանը նշեց, որ նման փառատոների արդյունքն առաջին հերթին հայկական ազգային պարի, հայկական շարժումների տարածումն է։ «Վարդևանյան» պարի թատրոնը փառատոնի շրջանակում ներկայացրեց «Վերածնունդ» համարը, որը խորհրդանշում է ավերիչ երկրաշարժից վերածնված Գյումրին։ Հովհաննես Վարդևանյանն ընդգծում է, որ Գյումրին միշտ էլ եղել է արվեստների քաղաք, և այժմ էլ ավանդույթը շարունակվում է։ Այսօր Գյումրիում կան շատ պարային խմբեր՝ թե՛ սկսնակ, թե՛ պրոֆեսիոնալ, փորձառու, որոնք լուրջ ծրագրեր են ներկայացնում և պատրաստ են հայկական պարը պատվով ցուցադրել ամենամեծ բեմերում։

Հայաստանի երիտասարդական հիմնադրամի հասարակայնության հետ կապերի ծառայություն