Այսօր պարուսույց Սուրեն Չանչուրյանի ծննդյան օրն է (տեսանյութ)

«Գիտեմ մի բան. նախ պետք է հոգիդ պարի, հետո` հոգուդ թռիչքը շարժումի վերածվի ու փոխանցվի մարմնիդ: Եթե պարելիս մտածում ես ինչպես պարել` վատ պարող ես, եթե մտածում ես ինչ պարել` ուրեմն, կհասնես հաջողության: Պարը ինքնարտահայտման միջոց է, հոգեւոր տարածք, հանդիսատեսի ու աշխարհի հետ զրուցելու միջոց: Պարելիս երակներումդ ժողովրդիդ արյունը պետք է հոսի, նախնիներիդ գենետիկ հիշողությունը, հպարտությունը` հայ լինել ու մնալու համար»:

Սուրեն Չանչուրյան

Պարուսույց Սուրեն Չանչուրյանը ծնվել է 1937 թ. սեպտեմբերի 23-ին, Լենինականում: Միջնակարգ դպրոցն ավարտելուց հետո, ավարտել է Երևանի բալետի դպրոցի ժողովրդական պարի բաժինը:

1967թ. ավարտել է Երևանի գյուղատնտեսության ինստիտուտի մեխանիկայի ֆակուլտետը:

1958թ. մասնակցել է մրցույթին և դարձել Հայաստանի պարի նորաստեղծ անսամբլի անդամ` պարուսույց Էդուարդ Մանուկյանի ղեկավարությամբ: Շատ շուտով դարձել է անսամբլի առաջատար մենապարողներից և ձեռք բերել հանրաճանաչություն: 25 տարվա ընթացքում ստեղծել է բազմաբնույթ պարային ոճեր` ժողովրդականից մինչ ռազմական և ժամանակակից: Առանձնանում են «Անահիտ և Վաչագան», «Բերդ», «Կինտո», «Սարդարապատ», «Քավոր և քավորկին» և այլ պարային համարներ: Ելույթներով հանդես է եկել աշխարհի բազմաթիվ երկրներում` Արևելքի, Եվրոպայի, Հարավային և Հյուսիսային Ամերիկայի: Եղել է Մեքսիկայում, Իսրայելում, Կանադայում և այլուր:

1993-2005թթ. ղեկավարել է Հայաստանի պարի պետական անսամբլը:

1973թ. արժանացել է ՀԽՍՀ վաստակավոր, 2006 թ.` ՀՀ ժողովրդական արտիստի կոչմանը: 2001 թ. պարգևատրվել է «Մովսես Խորենացի» պետական մեդալով, 2007 թ.` «Վարպետ» ոսկե մեդալով` հայկական մշակույթում ունեցած մեծ ավանդի համար:
Մահացել է 2009թ. մարտի 4-ին, Երևանում: