Տունը, որի ավտոտնակում Սթիվ Ջոբսը հավաքել էր առաջին Apple համակարգիչը, կվերածվի հուշարձանի

ԱՄՆ-ի Կալիֆորնիա նահանգի Լոս Ալտոս քաղաքում գտնվող տունը, որտեղ երիտասարդ տարիներին ապրել է Սթիվ Ջոբսը, և որի ավտոտնակում Սթիվ Վոզնյակի հետ ստեղծել է Apple I-ի նախատիպը, անշարժ գույքի գործակալների կողմից գնահատվել է 1.5 մլն դոլար: 

1952-ին կառուցված, 167 քառ. մետր մակերեսով այս բնակարանն ունի 3 ննջարան և 2 լոգարան: Տունը, սակայն, պաշտոնապես վաճառքի չի հանվել:

Դա պայմանավորված է այն հանգամանքով, որ Լոս Ալտոս քաղաքի իշխանություններն այս բնակարանը կարող են ճանաչել իբրև պատմական արժեք ունեցող անշարժ գույք, քանի որ «Ջոբսը մեծ ազդեցություն է թողել գալիք սերունդների վրա»: 

Այսօր քաղաքային խորհրդի պատմական ժառանգության հարցերով հանձնաժողովի 7 անդամներ կորոշեն տան հետագա ճակատագիրը: Եթե որոշումը դրական լինի, ապա Ջոբսի տունը կվերածվի պատմական հուշարձանի: 

Նշենք, որ Սթիվ Ջոբսը տեղափոխվել էր այս բնակարան 7-րդ դասարանում: Բնակարանը պատկանում էր նրան որդեգրած ծնողներին: