Հերթական նորամուտը` Վեդու մշակույթի տանը

ՀՀ քաղաքաշինության նախարարությունը շահագործման հանձնեց այս տարվա հերթական մշակութային օբյեկտը: Սեպտեմբերի 25-ին նորամուտը նշեց Վեդի քաղաքի մշակույթի տունը, որի բացման հանդիսավոր արարողությունը իր ներկայությամբ պատվեց Հանրապետության նախագահ Սերժ Սարգսյանը:

«Հանրապետության նախագահի հանձնարարականի համաձայն` շենքի հիմնանորոգման ընդհատումներով ընթացող շինաշխատանքներն ավարտուն տեսք ստացան, հիմնականում' անցած եւ այս տարվա լայնածավալ աշխատանքների շնորհիվ: Հիմնանորոգման վրա ծախսվել է շուրջ 350 մլն դրամ»,- հանդիսության ժամանակ նշեց ՀՀ քաղաքաշինության նախարար Սամվել Թադեւոսյանը: Նա տեղեկացրեց, որ Վեդու մշակույթի 286 տեղանոց տունը համապատասխանում է ժամանակակից մշակութային հաստատության պահանջներին: Կառույցն ունի հարմարավետ դահլիճ, տարատեսակ խմբակների համար նախատեսված սենյակներ: Երկհարկանի մշակույթի տան կառուցապատման մակերեսը կազմում է շուրջ 2210 քառ մետր: Անցած դարի 30-ական թվականներին աղյուսից կառուցված շենքը տարիների ընթացքում ամբողջովին քայքայվել էր, իսկ 1988 թվականի երկրաշարժից հետո դադարեցվել էր շենքի շահագործումը: Շինարարական օբյեկտի 2011 թվականի նախագծային լուծումները մշակվել են 9 եւ ավելի բալականության սեյսմիկ վտանգի պահանջներին համապատասխան:

«Բնակարանային շինարարությանը զուգահեռ, որը հիմնականում ընթանում է աղետի գոտում, քաղաքաշինության նախարարությունը հատուկ նշանակություն է տալիս ամբողջ հանրապետությունում կրթական եւ մշակութային օբյեկտների հիմնանորոգմանը' անհրաժեշտության դեպքում նաեւ նոր շենքերի կառուցման խնդրին»,- ընդգծեց նախարար Սամվել Թադեւոսյանը:

Այս տարի քաղաքաշինության նախարարության «Քաղաքաշինական» ԾԻԳ-ը շահագործման է հանձնել 5, մինչեւ տարեվերջ եւս մեկ կրթական, մշակութային օբյեկտ, իսկ եկող տարի արդեն 15 կրթական, մշակութային օբյեկտ: