Բաղդասարովը պատժում է իր աշխատողներին

Այսօր իրենց խնդիրները ՀՀ նախագահին ներկայացնելու համար նախագահի նստավայրի մետ հավաքված «Արմավիայի» 20 աշխատակիցները պատմել են, որ ընկերության սեփականատեր Միկա Բաղդասարովը որոշել է պատժել իրենց և չվճարել նախորդ ավելի քան 1 տարվա չվճարված աշխատավարձերը: Իսկ զայրույթի պատճառն այն է, որ «Արմավիայի» այդ աշխատակիցները դեռ մայիս ամսին չվճարված աշխատավարձը նախկին գործատուից բռնագանձելու հայցով դիմել էին դատարան:

«Զուտ նրա համար, որ մենք դիմել ենք դատարան, Բաղդասարովը մեզ պատժի է ենթարկում, և այն 20 հոգուն, ովքեր դիմել են դատարան, հրաժարվում է փող տալ»,- «Փաստինֆո»-ի հետ զրույցում ասել է «Արմավիայի» բորտուղեկցորդուհի Քրիստինե Մկրտչյանը:

Նշենք, որ ընկերությունում սկսել են մաս-մաս վճարել նախորդ տարվա հոկտեմբեր-նոյեմբեր ամիսներից ի վեր պարտք մնացած աշխատավարձերը: Բայց ինչպես, վստահեցնում են այսօր ՀՀ նախագահի նստավայրի դիմաց հավաքված աշխատակիցները, ոչ բոլորին: Նախկին գործատուի զայրույթին արժանացած աշխատակիցները պատմել են նաև, որ փորձել են հանդիպել ընկերության ղեկավարությանը, սակայն, ո’չ տնօրենը, ո’չ էլ փոխտնօրենը, չեն ընդունել իրենց:

«Մեզ ընդունեց ֆինանսական տնօրենը, ով բացահայտ ասաց, որ Բաղդասարովը կոնկրետ ձեր 20-ի վերաբերյալ հրահանգ է տվել, որ աշխատավարձ չբաժանեն»,- պատմել է զրուցակիցը:

Պետական բոլոր մարմիններում իրենց բողոքին ի պատասխան դարձյալ խորհուրդ են տվել դիմել դատարան, մինչդեռ իրենք պնդում են, որ դատարաններում էլ Բաղդասարովի միջմտությամբ հայցի քննությունն անվերջ հետաձգվում է: