Կասկադում լապտերներ կվառվեն ի հիշատակ Ջերարդ Գաֆէսճեանի

Գաֆէսճեան արվեստի կենտրոնը տեղեկացնում է, որ սեպտեմբերի 27-ին ժամը 21:00-ին տեղի կունենա լուսավառության հատուկ արարողություն՝ նվիրված կենտրոնի հիմնադիր, ազգային մեծ բարերար Ջերարդ Գաֆէսճեանի հիշատակին: Խորհրդանշորեն, լուսավառությունը կհաջորդի Գաֆէսճեան քանդակների պարտեզում կազմակերպվող «Կարին» համույթի հայկական ավանդական պարերի ուսուցման այս տարվա վերջին միջոցառմանը, որն արժանացել էր պարոն Գաֆէսճեանի հատուկ ուշադրությանը և անց էր կացվում նրա հովանավորությամբ:

Միջոցառումից անմիջապես հետո, ուղիղ ժամը 21:00-ին Կասկադ համալիրի աստիճաններին տեղակայված մասնակիցները հատուկ ազդանշանի ներքո կվառեն նախապես տրամադրված լապտերները՝ ի հիշատակ մեծ հայրենասեր Ջերարդ Գաֆէսճեանի:

Գաֆէսճեան արվեստի կենտրոնը հրավիրում է բոլոր համաքաղաքացիներին մասնակցելու այս նվիրական արարողությանը և հարգանքի տուրք մատուցելու մեծ հայրենակցին:

Գաֆէսճեան արվեստի կենտրոնի (ԳԱԿ) առաքելությունն է ժամանակակից արվեստի լավագույն նմուշները ցուցադրել Հայաստանում և աշխարհին ներկայացնել հայկական մշակույթի լավագույնը: 2009 թվականի նոյեմբերին տեղի ունեցած բացումից առ այսօր Գաֆէսճեան արվեստի կենտրոնը, հավատարիմ իր առաքելությանը, կազմակերպում է բազմազան ցուցահանդեսներ, ներկայացնում ժամանակակից արվեստի յուրօրինակ գործեր, իրականացնում ֆիլմերի ցուցադրություններ, համերգաշարեր, դասախոսություններ և կրթական ծրագրեր: Գաֆէսճեան արվեստի կենտրոնի տարեկան այցելությունների թիվը գերազանցում է 1,000,000: