ՄԱԿ ԱԽ 1540 բանաձևի իրականացման ծրագրի մշակմանը նվիրված աշխատաժողով` ՀՀ ԱԳՆ-ում

2013թ. սեպտեմբերի 24-25-ը ՀՀ ԱԳՆ-ում անցկացվեց ՀՀ Վարչապետի 2013թ. հուլիսի 15-ի թիվ 562-Ա որոշմամբ ստեղծված Աշխատանքային խմբի եւ Միջազգային փորձագետների առաջին աշխատաժողովը:

ՄԱԿ-ի ԱԽ 1540 բանաձեւը, որն ընդունվել է 2004թ., հանդիսանում է զանգվածային ոչնչացման զենքերի տարածման դեմ պայքարի առանցքային միջազգային գործիքներից մեկը: Բանաձեւի իրականացմանը համալիր աջակցություն տրամադրելու նպատակով հիմնվել է ԱԽ 1540 կոմիտեն:

Աշխատանքային խումբը ստեղծվել է ՄԱԿ ԱԽ 1540 բանաձեւի իրականացման գործողությունների ազգային ծրագիր մշակելու եւ ԵԱՀԿ ու այլ միջազգային գործընկերների հետ այդ ոլորտում համագործակցության գործնական քայլեր ձեռնարկելու նպատակով: Այն ներառում է ՀՀ արտաքին գործերի, Էներգետիկայի եւ բնական պաշարների, Արտակարգ իրավիճակների, Էկոնոմիկայի, Բնապահպանության, Առողջապահության, Գյուղատնտեսության նախարարությունները, ինչպես նաեւ' ՀՀ ԱԱԾ, Պետական եկամուտների եւ Միջուկային անվտանգության պետական կոմիտեները:

Միջազգային փորձագետները ներկայացնում են ԵԱՀԿ-ն, ԵՄ Քիմիական, կենսաբանական, ռադիոլոգիական եւ միջուկային հարցերով Թբիլիսիի Գերազանցության տարածաշրջանային կենտրոնը, ՄԱԿ-ի Միջտարածաշրջանային հանցագործությունների եւ արդարադատության հարցերով հետազոտական ինստիտուտը, ՄԱԿ ԱԽ 1540 կոմիտեն:

Զանգվածային ոչնչացման զենքերի եւ դրանց փոխադրման միջոցների տարածման դեմ պայքարի խնդիրներն առավել քան արդիական են եւ հանդիսանում են միջազգային հանրության օրակարգի կարեւոր բաղկացուցիչ: ՀՀ Գործողությունների ծրագրի մշակումը եւ արդյունավետ իրականացումը կարեւորվում է գործուն ազգային մեխանիզմներ ստեղծելու եւ միջազգային փոխգործակցության տեսանկյունից: