Ղարաբաղի օդանավակայանում քաղաքացիական ինքնաթիռները տեխնիկական թռիչքներ են փորձարկում

Ինչպես հաղորդում է РЕГНУМ գործակալությունը, հղում կատարելով «Զվարթնոց» օդանավակայանի իր աղբյուրներին, ղարաբաղյան «Էյր Արցախ» ավիաընկերությունը ներկա պահին իր տնօրինության տակ 2 օդանավ ունի, որոնցից մեկի անձնակազմը Ստեփանակերտի օդանավակայանում քաղաքացիական ինքնաթիռներով թռիչքներ է մշակում:

Համաձայն այդ  աղբյուրների` Ստեփանակերտում տեխնիկական թռիչքներ են իրականացվում` մշակելու համար բարդ լեռնային տեղանքում թռիչքներն ու վայրէջքներն իրականացնելու հնարավորությունները` հաշվի առնելով Ադրբեջանի հետ զորքերի կրակագծին մոտ գտնվելու վտանգը: 

Եթե խորհրդային ժամանակներում ինքնաթիռներն Արցախի օդանավակայանում վայրէջք էին կատարում արևելքից, ապա այժմ նրանք ստիպված են իջնել արևմուտքից` Հայաստանի կողմից` խուսափելու համար Ադրբեջանի կողմից ավիահարձակումների ենթարկվելու վտանգից: Այդ նպատակով մեծ աշխատանքներ են տարվել` միլիոնավոր քառ. մետր տարածքով հողային զանգվածները փորելու և օդանավակայանի ռելիեֆը հարթեցնելու համար: 

Լեռնային Ղարաբաղի հանրապետության Քաղավիացիայի Գլխավոր վարչության պետ Դմիտրի Ատբաշյանը մի քանի օր առաջ հայտարարել էր, որ 15 օր հետո Լեռնային Ղարաբաղի կողմից ձեռք բերված ինքնաթիռները տեխնիկապես պատրաստ կլինեն Ստեփանակերտի օդանավակայանից թռիչքներ իրականացնելուն: 

Նշենք, որ Ստեփանակերտի օպդանավակայանը կառուցվել է 1974թ. և գործում էր մինչև 1992-ը, երբ Ղարաբաղի և Ադրբեջանի միջև սկսվեցին մեծամասշտաբ պատերազմական գործողությունները: Օդանավակայանի վերակառուցման աշխատանքները սկսվել էին 4 տարի առաջ: 

Ադրբեջանը բազմիցս հայտարարել է Ստեփանակերտից թռիչք իրականացնող ցանկացած ինքնաթիռ կործանելու իր վճռականության մասին: Միջազգային հանրությունը բացասական արձագանք տվեց Բաքվի նման հայտարարություններին, իսկ պաշտոնական Երևանը հայտարարեց, որ դա «պետական ահաբեկչության դրսևորում է»: