Նրա մարմնավորած կերպարներով մեր ժողովրդի մեկ սերունդ չէ, որ դաստիարակվել է. Տարոն Մարգարյան

Երևանի քաղաքապետ Տարոն Մարգարյանն աայսօր ցավակցական հեռագիր է հղել ՀՀ ժողովրդական արտիստ Սոս Սարգսյանի մահվան կապակցությամբ:

«Մեծ վշտով տեղեկացա սիրված դերասան, ԽՍՀՄ և ՀՀ ժողովրդական արտիստ, պետական մրցանակի եռակի դափնեկիր Սոս Սարգսյանի մահվան գույժի մասին:

Սոս Սարգսյանն ապրող լեգենդ էր, հայկական բեմարվեստի, թերևս, ամենահեղինակավորներից մեկը: Նրա մարմնավորած կերպարներով մեր ժողովրդի մեկ սերունդ չէ, որ դաստիարակվել է, դաստիարակվել որպես հայրենասեր, որպես մարդ ու քաղաքացի: Քաղաքացիական իր հստակ դիրքորոշմամբ, նա հաճախ օրինակ է հանդիսացել շատերի համար: Գալիք սերունդներն ու ժամանակը դեռ իրենց գնահատականը կտան մեծ հայրենասերի, տաղանդավոր մարդու ու քաղաքացու, նաև գրողի ու մանկավարժի նրա վաստակին ու անցած ճանապարհին: Իսկ այսօր նրա կորստով մի շատ կարևոր բան պակասեց մեր հասարակությունում:

Ցավում եմ ու ցավակցում մեծն վարպետի հարազատներին, բարեկամներին, նրա բազմահազար երկրպագուներին, մեզ բոլորիս»։