«Հավաքականի նպատակը միշտ մեկն է՝ անցնել հաջորդ փուլ». Վարազդատ Ավետիսյան (տեսանյութ)

Ինչպես արդեն տեղեկացրել ենք, Հայաստանի մինչև 17 տարեկանների հավաքականը շարունակում է նախապատրաստվել հոկտեմբերի 23-ից 30-ը Հայաստանում կայանալիք Եվրոպայի մինչև 17 տարեկանների 2013/2014 առաջնության որակավորման փուլի 7-րդ խմբի մրցաշարին: Մեր հավաքականը սեպտեմբերի 25-ից անցկացնում է մարզական հավաք, որը կտևի մինչև հոկտեմբերի 3-ը: ՀՖՖ պաշտոնական կայքը հարցազրույց ունեցավ Հայաստանի մինչև 17 տարեկանների հավաքականի գլխավոր մարզիչ Վարազդատ Ավետիսյանի հետ:

-Պարոն Ավետիսյան, ի՞նչ է նախատեսված այս մարզական հավաքի ընթացում:

- Հավաքը նոր է սկսվել և ինձ համար առայժմ ավելի շատ ճանաչողական բնույթի է, քանի որ շատ կարճ ժամանակ է, ինչ ես գլխավորում եմ այս տարիքային հավաքականը: Նախատեսել ենք անցկացնել երկու ստուգողական հանդիպում Վրաստանի հավաքականի հետ և մեկ հանդիպում՝ «Փյունիկ-2-ի»: Պետք է կարողանանք շատ կարճ ժամանակում կատարել ընտրություն և պատշաճ կերպով նախապատրաստվել մրցաշարին:

-Այն խաղացողները, որոնք Ձեր տրամադրության տակ են, բավարարո՞ւմ են Ձեզ, թե կան խաղացողներ, որոնք տարբեր պատճառներով բացակայում են այս հավաքի ընթացքում:

-90 տոկոսով մրցաշարին կմասնակցեն հենց այս խաղացողները, բայց հնարավոր է՝ լինեն նաև փոփոխություններ: Արտասահմանից հրավիրել էինք 6 ֆուտբոլիստի, որոնցից երկուսը չկարողացան ժամանել: Ժամանած 4 լեգիոներներից մեկին հաստատապես կընդգրկենք կազմի մեջ, իսկ մյուս երեքի կարողություններին դեռ պետք է ծանոթանանք: Ցանկալի կլիներ, որ մեր լեգիոներները լինեին մինչև 19 տարեկանների հավաքականի լեգիոներների նման, որոնք արդեն երկու տարի է՝ հանդես են գալիս իրենց տարիքային հավաքականում:

-Այսինքն, կապված շատ նորեկների առկայության հետ, հնարավո՞ր է թիմում լինի խաղակցվածության պակաս:

-Իրականում, նորեկներն այնքան էլ շատ չեն: Եթե հրավիրված լեգիոներները վերջնականորեն ընդգրկվեն կազմ, ապա հնարավոր է՝ լինեն որոշակի խնդիրներ խաղակցվածության հետ: Բայց մենք կաշխատենք լուծել դրանք մինչև մրցաշարի մեկնարկը:

-Ի՞նչ նպատակներ են դրված այս հավաքականի առջև:

-Նպատակը միշտ մեկն է՝ անցնել հաջորդ փուլ: Պաշտպանությունում ունենք որոշակի խնդիրներ, որոնց վրա աշխատում ենք վերջին օրերին: Եթե կարողնանանք լուծել այդ խնդիրները, գոլեր կխփենք: Ամեն դեպքում աշխատելու ենք ամեն ինչ անել՝ հաջող հանդես գալու համար՝ հատկապես հաշվի առնելով, որ մրցաշարն անցկացվելու է մեզ մոտ: