Սեմինար՝ «Հայ երիտասարդը՝ ընդդեմ քայքայիչ պաշտամունքների» խորագրով

Սեպտեմբերի 27-ին Ծաղկաձորում մեկնարկել է «Հայ երիտասարդը՝ ընդդեմ քայքայիչ պաշտամունքների» խորագրով ծրագիրը։ Այն իրականացնում են Հայաստանի երիտասարդական հիմնադրամը և «Ոչ պետական բուհերի ուսանողական կենտրոն» հասարակական կազմակերպությունը։

Միջոցառման նպատակն է ոչ պետական բուհերի ուսանողներին հնարավորություն տալ անդրադառնալ երիտասարդության արդի հիմնախնդիրներից մեկին`անձի վրա ունեցած քայքայիչ պաշտամունքների կործանարար ազդեցությանը, մանրամասնորեն ուսումնասիրել դրանց ազդեցության մեխանիզմները, գտնել դրանք կանխարգելելու ուղիները և անմիջական շփման միջոցով առկա խնդիրները ներկայացնել ոլորտի պատասխանատուներին:

Եռօրյա ծրագրին մասնակցում է ոչ պետական բուհերի շուրջ 50 ուսանող, ովքեր քննարկումների ընթացքում հանդիպումներ են ունենում հոգևորականների հետ։

«Ոչ պետական բուհերի ուսանողական կենտրոն» հասարակական կազմակերպության նախագահ Արմինե Բարսեղյանը նշեց, որ Հայաստանում այսօր քայքայիչ աղանդների գործունեությունը սպառնալիք է մեր ազգային անվտանգությանը։ «Հանրությունը, հատկապես երիտասարդները պետք է զգոն լինեն, տեղեկացված։ Քայքայիչ աղանդների դեմ պետք է տարվի ամենօրյա աշխատանք։ Մենք պարբերաբար ծրագրեր ենք իրականացնում երիտասարդական տարբեր խմբերի հետ՝ ներկայացնելով քայքայիչ աղանդների բացասական ազդեցությունը»,- ասաց ՀԿ-ի նախագահը։

Հայաստանի երիտասարդական հիմնադրամի հասարակայնության հետ կապերի ծառայություն