Մաքրվում են արձրևատարները

«Երևան Ջուր» ընկերությունը սկսել է մայրաքաղաքի անձրատար համակարգի մաքրման հերթական աշխատանքները:

Գործող կարգի համաձայն, տարին երկու անգամ՝ գարնանն ու աշնանը, իսկ առավել «խոցելի» վայրերում` ավելի հաճախակի, ընկերության «Արևելք» և «Արևմուտք» շահագործման տնօրինությունների տարածքային տեղամասերը մաքրում են /նաև բարձր ճնշման օդ փչող հատուկ մեքենաների օգնությամբ/ կուտակված աղբից ինչպես փողոցների անձրևընդունիչների դիտահորերը, այնպես էլ` դրանցից դեպի կոյուղու կոլեկտորներ ձգվող խողովակաշարերը: Ընդ որում, անձրևընդունիչների վնասված թուջե ցանցերի փոխարեն տեղադրվում են նորերը: Նշված աշխատանքները կատարվում են անձրևային եղանակներին ընդհառաջ՝ կանխարգելիչ նկատառումներով, անձրևաջրերի կուտակումներից խուսափելու և դրանց անխափան հեռացումն ապահովելու նպատակով:

Ինչպես տեղեկացրեց ընկերության «Կենտրոն» շահագործման տեղամասի գլխավոր ճարտարագետ Արթուր Զակեոսյանը, մայրաքաղաքի կենտրոնում անձրևընդունիչները մաքրվում են ինչպես փողոցներում, այնպես էլ ստորգետնյա անցումներում: Վերջին դեպքում՝ ճանապահային ոստիկանության հետ համագործակցությամբ: Մասնավորապես, արդեն մաքրվել են անձրևընդունիչները Մաշտոցի պողոտայի, Խանջյան փողոցի և Աբովյան փողոց-Մյասնիկյան պողոտա անցումներում:

Ընկերության շահագործման տեղամասերը անում են հնարավորինս աշխատանքները սեղմ ժամկետներում ավարտելու համար:

«Երևան Ջուր» ՓԲԸ հաղորդակցության բաժին