Վիճաբանություն սեմինարի ընթացքում. Հայաստանի ներկայացուցիչը «տեղն է դրել» ադրբեջանցուն

Այս օրերին «Մարդը կարիքի մեջ» ՀԿ-ի կողմից իրականացվում է «Կավկադոկ» վավերագրական ֆիլմերի փառատոնը: Այս փառատոնի շրջանակներում նախօրեին Քոբուլեթիում հանդիպել են Հայաստանի, Վրաստանի և Ադրբեջանի այն հասարակական կազմակերպությունների ներկայացուցիչները, ովքեր իրենց քաղաքներում պիտի կազմակերպեն փառատոնները: Հայաստանում անց է կացվելու Սյունիքի, Վայոց Ձորի, Լոռու, Տավուշի, Շիրակի մարզերում:

Սյունիքի մարզում ծրագիրը իրականացնող «Երկյակ» ՀԿ-ի ներկայացուցիչը, երբ հանդիպման ընթացքում խոսել է Հայաստանում նկարահանված վավերագրական մի ֆիլմի մասին, պատմել է, որ հայ-ադրբեջանական հակամարտության արդյունքում, երբ ադրբեջանական օդուժը ռմբակոծում էր հայ խաղաղ բնակիչներին, մանկահասակ աղջնակը կորցնում է երկու ձեռքերը և այժմ պայքարում է պատերազմի թողած հետքերի վերացման, նոր կենսակերպի համար: Ադրբեջանական պատվիրակությունը պատմության այս դրվագի ժամանակ ագրեսիվ վերաբերմունք է ցուցաբերել` բողոքելով, թե ինչու է շեշտվում, որ Ադրբեջանն է մեղավոր:

Lurer.com-ի թղթակցի հետ զրույցում հայաստանյան պատվիրակության ներկայացուցիչ Կարեն Շահգելդյանը պատմեց, որ այդ ընթացքում իր նյարդերը տեղի են տվել, և մի լավ «տեղն է դրել» պատմությունն աղավաղող ադրբեջանցիներին:

«Ադրբեջանական պատվիրակությանը հորդորեցի չաղավաղել պատմությունը, որովհետև նոր սերունդը ինչքան էլ որ հանդուրժող է, միևնույն է, կան իրողություններ, որ անհերքելի են»,- ասում է մեր երկրի ներկայացուցիչ Կարեն Շահգելդյանը:

Երկարատև բանավեճից հետո ադրբեջանական պատվիրակությունը չի կարողացել հիմնավոր ընթացք տալ. լռել են և շարունակել սեմինարը` առանց որևէ անդրադարձի: