Բիզնես-լեդի Հերմինե Նաղդալյանը վերադարձրեց զավթված աթոռը ՀՀ նախագահին

Հայաստանյան մամուլը հաճախ է գրում ԱԺ տղամարդ պատգամավորների բիզնեսների մասին, սակայն քչերը գիտեն, որ մեր հայրենի խորհրդարանում օրենքներ են արարում կանայք, որոնց ունեցվածքին և օլիգարխիկ կենսակերպին կնախանձեին շատ ու շատ առնական պատգամավորներ: Թերևս, ժամանակն է անդրադառնալու նաև մեր ժամանակների յուրահատուկ բիզնես-լեդիների գործունեությանը, որպեսզի չխախտենք այնպիսի նուրբ համակեցություն, ինչպիսին գենդերային հավասարակշռությունն է: Lurer.com-ը պարբերաբար կանդրադառնա գործարար կին պատգամավորների գործունեությանը:

Հայաստանի խորհրդարանի բիզնես-լեդիների շարքը, անկասկած, գլխավորում է ԱԺ փոխնախագահ Հերմինե Նաղդալյանը: Թե ինչ անուրանալի վաստակի համար է իշխող կուսակցությունը նրան վստահել երկրի առանցքային պաշտոններից մեկը՝ դա դեռ պետք է հասկանալ, հատկապես` այն պարագայում, երբ երկրի Սահմանադրությունն արգելում է նմանատիպ անձանց մուտքը խորհրդարան: Երևի հայրենի իշխանությունները մեր խորհրդարանականների բալանսներում փնտրում, բայց այդպես էլ չեն գտնում բիզնեսներ՝ սկսած մեր խորհրդարանում անթիվ-անհամար օլիգարխներով և կիսաօլիգարխիկ տարրերով` վերջացրած քաղաքակիրթ բառապաշարով բիզնես–լեդի հորջորջվող գործարար կին պատգամավորներով:

Քանի որ սեռային պատկանելությունը չի արդարացնում պատգամավորների՝ տնտեսական գործունեություն ծավալելու սահմանադրական արգելքի խախտումը՝ ներկայացնում ենք մեր շարքի առաջին հերոսուհու՝ Հերմինե Նաղդալյանի բիզնես-գործունեության մասին մեզ հայտնի տվյալները: Վստահ ենք, որ հանրությունը երբեք ամբողջապես չի տիրապետում նմանատիպ անձանց ունեցած բիզնեսների ցանկին, բայց առկա փաստերն իսկ խոսուն վկայություն են այն մասին, որ օրը ցերեկով կոպտորեն ոտնահարվում է ՀՀ Սահմանադրությունը:

Եվ այսպես, ըստ շատ հավաստի խոսակցությունների` Հերմինե Նաղդալյանին է պատկանում Սիսիանի բազալտի քարհանքը, ռեստորան Սիսիանում, Սիսիան-Երևան երթուղային, տեղի տաքսի ծառայությունը։ Ըստ նույն աղբյուրների` ԱԺ փոխնախագահը փայատեր է Սիսիանի հիդրոէլեկտրակայանում։ Որպես շարքային օլիգարխիկ հակումներով օրենսդիր` տիկին Հերմինեն զերծ չի մնացել նաև բիզնեսների վերաբաշխման ներիշխանական բազարներից. հիշենք տարիներ առաջ Սյունիքի` արդեն նախկին մարզպետ Սուրիկ Խաչատրյանի հետ ունեցած ռազբորկաները` Սյունիքում ունեցած իր բիզնեսների փայաբաժինների հետ կապված: Բոլորովին վերջերս մամուլում տեղեկություններ հայտնվեցին, որ Հերմինե Նաղդալյանն ու «Վաճառականների միություն» ՀԿ նախագահ Ցոլվարդ Գևորգյանը որոշել են միասին չրերի գործարան բացել։ Ընկերուհիների բիզնես-նախագծի մասին խոսակցությունները հերքելու փորձեր, իհարկե, եղան, սակայն ոչ մի պատգամավոր երբեք չի հաստատում նմանատիպ տեղեկությունները:

Շատ հետաքրքիր է, որ հայրենի խորհրդարանում Սահմանադրության խախտմամբ բազմած տիկնոջ տնտեսական գործունեության մասին իշխանությունները տեղյակ չեն: Որևէ մեկի համար տարօրինակ չէ՞, որ պատգամավորական խղճուկ աշխատավարձով ապրող տիկինը հայտարարագրել է 781 մլն 548 հազար դրամ եկամուտ անցած՝ 2012 թվականի ընթացքում (3 մլն 153 հազարը` պատգամավորի աշխատավարձ, մնացածը` շահաբաժին և փոխառություն): Սա միայն պատգամավորի օրինական հայտարարագրված եկամուտն է, այս թվերի լույսն ու ստվերը թողնում ենք ընթերցողների խղճին: Ժամանակը չէ՞, որ պետությունը հետևի, որ թաքցրած բիզնեսներ ունեցող անձիք չգան խորհրդարան, այլ զբաղվեն իրենց գործարարությամբ: Երկրի ղեկավարները ինչու՞ են աչք փակում այս երևույթի վրա: Ուղարկեք՝ թող իրենց բիզնեսները զարգացնեն, ինչո՞ւ եք երկրի հոգսերը բարդում նրանց փխրուն ուսերին:

Թերևս հատկանշական է օրեր առաջ ԱԺ-ում Հերմինե Նաղդալյանի հետ տեղի ունեցած միջադեպը: Lurer.com-ը ֆիքսել էր, թե ինչպես է Նաղդալյանը վերցրել և իր համար նախատեսված վայրում տեղադրել Սերժ Սարգսյանի ոսկեզօծ աթոռը՝ փոխարենը տեղադրելով իր՝ առավել համեստ աթոռը: Բանն այն է, որ ԱԺ ամբիոնում նախատեսված չորս աթոռներն էլ ունեն իրենց հստակ հասցեատերը՝ ՀՀ և ԱԺ նախագահների աթոռները տարբերվում են մյուս երկուսից՝ ոսկեզօծված են և նախատեսված են բացառապես երկրի երկու առանցքային պաշտոնյաների համար: Այս դեպքում տիկինը բազմել էր ՀՀ թիվ մեկ պաշտոնյայի աթոռին: Մեր հրապարակումից հետո, իհարկե, աթոռները կրկին դրվեցին իրենց տեղերում, այսպես ասած՝ Հայաստանում սահմանադրական կարգը վերականգնվեց: Երևի ժամանակն է, որ նույն սահմանադրության շրջանակներում Նաղդալյանը ուղարկվի հայրենի եզերք՝ զբաղվելու համար սիրելի աշխատանքով՝ բիզնեսով: