Ղարաբաղը եղել է, կա և կմնա Եվրոպայի մաս

Աշխատանքային այցով Ֆրանսիայում գտնվող Հայաստանի նախագահ Սերժ Սարգսյանը երեկ Ստրասբուրգում հանդիպումներ է ունեցել Եվրոպայի խորհրդի խորհրդարանական վեհաժողովի (ԵԽԽՎ) նախագահ Ժան-Կլոդ Մինյոնի, ԵԽ գլխավոր քարտուղար Թորբյորն Յագլանդի եւ ԵԽ մարդու իրավունքների հանձնակատար Նիլս Մուիժնիկսի հետ: Նախագահը մասնակցել է նաեւ ԵԽԽՎ լիագումար նիստին, որտեղ հանդես է եկել ելույթով եւ պատասխանել վեհաժողովի անդամների հարցերին:

Հայաստանի առաջին նախագահությունը Եվրոպայի խորհրդի նախարարական կոմիտեում պատիվ համարելով` Սերժ Սարգսյանը, «լիրիկական շեղումներից» հետո, թե Հայաստանը եվրոպական արժեքներ է դավանում, «ազատ խոսքի ու ազատ մամուլի երկիր է», ձեռքբերումներ ունի ժողովդրավարության ու իրավունքի գերակայության հարցերում, նշեց նաեւ, թե լուրջ խնդիրներ ունենք, «ինչպիսիք են գործազրկությունն ու աղքատությունը, կոռուպցիան, որոնց հաղթահարման համար մեր կառավարությունը համալիր ծրագրեր է իրականացնում»:

«Մենք ունենք հաջողություններ, սակայն եղածով չենք բավարարվելու: Ես նախաձեռնել եմ Հայաստանի Հանրապետության Սահմանադրության բարեփոխումների գործընթաց, որի նպատակը մեր երկրում իրավունքի գերակայության սկզբունքի իրացման, մարդու հիմնական իրավունքների եւ ազատությունների երաշխավորման սահմանադրական կառուցակարգերը առավել կատարելագործելն է, իշխանությունների լիարժեք հավասարակշռումն ապահովելը եւ հանրային կառավարման արդյունավետությունը բարձրացնելը», ասաց Հայաստանի նախագահը ստրասբուրգյան ամբիոնից:

Այդուհետեւ նրա խոսքը վերաբերում էր Եվրոպական միության հետ հարաբերություններին:

Նախագահ Սարգսյանը կարեւորեց ԵՄ Արեւելյան գործընկերության շրջանակներում եւ Եվրոպայի խորհրդի հետ համագործակցությամբ ստեղծված «Արեւելյան գործընկերության գործիք» համատեղ ծրագիրը եւ դրա շրջանակներում մասնակից երկրներում իրականացված աշխատանքներըՙ ընտրական չափանիշների, դատաիրավական բարեփոխումների, արդյունավետ կառավարման, կոռուպցիայի եւ կիբեռհանցավորության դեմ պայքարի ուղղություններով:

«Այս օրերին հաճախ է խոսվում Եվրոպական միության Արեւելյան գործընկերության պետությունների քաղաքակրթական ընտրության մասին: Մենք միշտ հայտարարել ենք, որ պատրաստ չենք հարցն այդ հարթության մեջ դիտարկելու», ասաց Սարգսյանըՙ շեշտադրմամբ, թե Հայաստանը նպատակադրված է շարունակելու համակողմանի փոխշահավետ գործակցությունը Եվրոպական միության հետ: Ըստ նախագահիՙ Արեւելյան գործընկերության նախաձեռնության հենց սկզբից, անգամ դրանից առաջ, Հայաստանը ասել եւ շարունակում է ասել, որ ձգտում է հնարավորինս սերտ եւ ընդլայնված հարաբերություններ ունենալ Եվրոմիության հետ, մոտ լինել Եվրոմիությանը, եւ այս քաղաքականությունը չի ընդհատվելու:

Բացի դրանիցՙ Հայաստանը չի կառուցել նոր հարաբերություններ ի հաշիվ իր ռազմավարական դաշնակցի հետ հարաբերությունների: «Ճիշտ այնպես, ինչպես մենք մերժում ենք որեւէ գործընկերոջ հետ հարաբերությունների կառուցում, որոնք միտված լինեն որեւէ այլ գործընկերոջ դեմ: Մենք շարունակելու ենք մեր առանցքային գործընկերների հետ հարաբերությունների եւ շահերի համադրումը», Մաքսային միությանն անդամակցության համատեքստում հայտարարեց Սերժ Սարգսյանը:

Անդրադառնալով Լեռնային Ղարաբաղի խնդրինՙ Հայաստանի նախագահը, բարձր գնահատելով միջնորդական ջանքերը, նշեց, որ այդուհանդերձ, Հայաստանը գիտակցում է, որ պարտավոր է առաջին հերթին ապավինել իր ուժերինՙ հնարավոր բացասական զարգացումների դեպքում հակառակորդին զսպելու եւ խաղաղությունը պահպանելու համար: «Առավել եւս, որ մեր հարեւան երկրի ղեկավարը շարունակում է իր հրապարակային ելույթներում պատերազմով սպառնալ, հայերին համարել թիվ մեկ թշնամի, հպարտանալ ռազմական ծախսերի անհամաչափ աճով եւ սպառազինությունների կուտակմամբ»:

«Ադրբեջանի ժողովուրդը կամ նրա զգալի հատվածը իրականում չի կիսում նման տրամադրությունները: Պարզապես, ովքեր Ադրբեջանում փորձում են իրենց անկեղծ հիշողությունները պատմել հայ ժողովրդի հետ համատեղ անցյալից, նրանց ենթարկում են հրապարակային պարսավանքի, սպառնում են ականջը կտրել եւ արտաքսել երկրից: Այս պատճառով է, որ Ադրբեջանի ժողովրդի իրական տրամադրությունները չեն հնչում, եւ լսվում է այն, ինչ պահանջում է քարոզչամեքենան: Հենց այդ պատճառով են անարդյունավետ վստահության վերականգնման բոլոր միջոցառումների փորձերը»:

Հայաստանի նախագահը Ստրասբուրգում հիշատակեց նաեւ ՀՀ ժողովրդական արտիստ Սոս Սարգսյանի վերջին հրապարակային խոսքը, որ Ադրբեջանի մտավորականներին ուղղված բաց նամակ էր` խաղաղության, արդարության ու սթափության կոչով: «Դուք, ինչ է, լրջորեն պատրաստվում եք պատերա՞զմ սկսել: Թանկագին իմ հարեւաններ, ոչինչ չի՛ ստացվի, բացի անմեղ զոհերից: Ինչո՞ւ: Շատ պա՛րզ. ձեզ համար Ղարաբաղը տարածք է, իսկ մեզ համարՙ սուրբ Հայրենիք»,- իր նամակում պնդում էր մեծ մտավորականը:

«Ղարաբաղը եղել է, կա եւ կմնա Եվրոպայի մաս... Ես կարծում եմ, որ Եվրոպայի խորհուրդը կարող է, կարգավիճակից անկախ, ուղղակիորեն շփումներ նախաձեռնել Ղարաբաղի հետ` իր իսկ գործառույթների շրջանակներում, առավել եւս, երբ Եվրոպայի խորհուրդը նման փորձ ունի այլ հակամարտությունների գոտիներում», նշեց Սարգսյանը:

Մանրամասները` «Ազգ»-ի այսօրվա համարում: