«Նա զարմանալի, հրաշքի հասնող պատրաստակամությամբ գիտեր հավատալ». այսօր Արմեն Ջիգարխանյանի ծննդյան օրն է (տեսանյութ)

«Ինձ համար շատ հաճելի ու հեշտ էր աշխատել Արմենի հետ, հեշտ էր, քանի որ նա զարմանալի, հրաշքի հասնող պատրաստակամությամբ գիտեր հավատալ, կարողանում էր հավատալ, ցանկանում էր հավատալ:
Նրա հետ հաճույք էր աշխատելը, որովհետև նրա ստեղծագործական գրգիռը, երևակայությունը, հոգին, արյունը հարմարեցված էին, ծրագրված էին հավատալու ամենին, ամենքին …»:

Հենրիկ Մալյան

Կինոյի և թատրոնի հայ ականավոր դերասան Արմեն Ջիգարխանյանը ծնվել է 1935 թ. հոկտեմբերի 3-ին Երևանում։ Արմենը դերասան դառնալ երազել է դեռ մանկուց: Սերը թատրոնի հանդեպ նրա մեջ սերմանել է մայրը` Ելենա Վասիլևնան, որն առիթը երբեք բաց չի թողել դրամատիկական կամ օպերային ներկայցումներին ներկա գտնվելու համար: Նա Արմենին վաղ տարիքից է ծանոթացրել թատրոնի հետ: 

Դպրոցն ավարտելու պահին նրա` դերասան դառնալու որոշումը մայրիկին չզարմացրեց: Արմենի մանկությունն անցել է ռուսալեզու շրջապատում, ռուսական դպրոցում: Արմենը ցանկանում էր խաղալ ռուսական բեմում, և այդ ցանկությունը դպրոցն ավարտելուց հետո, 1953 թվականին նրան տարավ Մոսկվա: Բայց նա հանրահայտ ГИТИС չընդունվեց, չհավանեցին նրա հայկական շեշտադրմամբ ռուսերենը, որից նա մեծ վիրավորանք և տխրություն ապրեց:

Վերադառնալով հարազատ քաղաք, նա մոտ մեկ տարի կինոստուդիայում լուսավորող էր աշխատում և միաժամանակ նաև պատրաստվում էր ընդունվել Երևանի թատերա-գեղարվեստական ինստիտուտ: 1954 թվականին ընդունվելով ինստիտուտ` նա շուտով աչքի է ընկնում իր ուրույն կերպարով, ձայնով ու բնատուր տաղանդով, ստանձնում է գլխավոր դերերը ամենատարբեր ներկայացումներում: 1967 թվականին Ջիգարխանյանը Երևանից հեռանում է Մոսկվա` նորանոր հաջողված դերեր խաղալով Էֆրոսի ղեկավարած ռուսական թատրոնում:

1996 թվականին  Արմեն Ջիգարխանյանը հիմնադրում է իր Д թատրոնը։

Արմեն Ջիգարխանյանը Գինեսի ռեկորդների գրքում է հայտնվել որպես ամենաշատ նկարահանվող ռուս դերասան. նա ավելի քան 300 դեր ունի կինոյում: Մինչդեռ դերասանը վստահ է, որ իր լավագույն դերը դեռ չի խաղացել: Նրա ամենահայտնի ֆիլմերից են` «Բարև, ես եմ», «Եռանկյունի», «Ռուսական կայսրության թագը կամ նորից անորսալիները», «Անորսալիների նոր արկածները», «Տղամարդիկ», «Երբ գալիս է սեպտեմբերը», «Հարսնացուն հյուսիսից», «Հուսո աստղ», «Արևիկ», «Թեհրան-43», «Գիքոր», «Օտար խաղեր» և այլն: