Լրագրողների ջարդ Սաբիրաբադում` «Մահ հայերին» կոչով

Երեկ Ադրբեջանի նախագահի ընդդիմադիր թեկնածու Ջամիլ Հասանլիի նախընտրական հանդիպումը Սաբիրաբադի մարզադաշտում վերածվել է արյունալի բախումների: «Ենի մուսավաթ»-ի տեղեկագրմամբՙ Սաբիրաբադի գործադիր իշխանության ղեկավար Նազիմ Իսմայիլովն «անձամբ կոչ է արել հաշվեհարդար տեսնել Ջամիլ Հասանլիի նկատմամբ»:

Տեղի ընդդիմադիր ուժերը, սակայն, «կենդանի պատնեշ են դարձել հարձակվողների եւ Ջամիլ Հասանլիի ու ԱԺՃ առաջնորդ Ալի Քերիմլիի միջեւ, նրանց դուրս բերել մարզադաշտից»: Նախընտրական հանդիպումը դեռ չսկսված` ավարտվել է:

Հաշվեհարդարի նետված ջարդարարների թիրախ են դարձել Բաքվից գնացած լրագրողները: «Թուրան» գործակալության հաղորդագրմամբՙ «ոստիկանությունը ոչ միայն չի կանխել ջարդը, այլեւ արգելափակել է լրագրողներին` հնարավորություն չտալով, որպեսզի վերջիններս կարողանան գոնե փախչել»:

Տուժել են «Թուրան»-ի ֆոտոլրագրող Էթիմադ Բուդաղովը, «Ենի մուսավաթ» թերթի աշխատակիցներ Ռոյա Ռաֆիեւան եւ Նարգիզ Յաղուբլին, «Ազադլիգ» թերթից` Ռամին Դեկոն եւ Սեւինջ Վագիֆգըզին, ինչպես նաեւ անկախ լրագրողներ Իլհամ Ռասուլզադեն, Սաբիր Բաջարանը, Ջհանգիր Յուսիֆլին, Մուհամել Թյուրքանը եւ ուրիշներ:

Բոլորն ստացել են տարբեր աստիճանի մարմնական վնասվածքներ, իսկ «մեկ լրագողի ատամներն են փշրել»:

Հաղորդագրվում է, որ «լրագրողները մեծ ջանքերի գնով են միայն կարողացել դուրս գալ հարձակվողների եւ ոստիկանության շրջափակումից»: Ընդդիմադիր քաղաքական գործիչները շտապել են լքել Սաբիրաբադը:

Սաբիրաբադյան ջարդի նախօրեին հանրային կոչվող հեռուստատեսության ուղիղ եթերում «Իսկական մուսավաթ» կոչվող խմբավորման առաջնորդ Հաֆիզ Հաջիեւը, որին ադրբեջանական ոչ իշխանամետ մամուլը կնքել է «ընտրություններում վարչախմբի ներդրած սադրիչ», Ադրբեջանի «պատվախնդիր քաղաքացիներին» կոչ է արել «հրապարակային քարածեծ անել Ջամիլ Հասանլիին եւ Ալի Քերիմլիին, որտեղ էլ նրանց հանդիպեն»:

Իր «հայրենասիրական պատգամին» ավելի մեծ կարեւորություն տալու համար Հաջիլին «բոլոր ադրբեջանցիներին տեղեկացրել է, որ Ջամիլ Հասանլիի փեսան թեեւ հանդես է գալիս որպես անգլիացի, բայց իրականում հայկական ծագում ունի»:

Ըստ ամենայնի, երեկ Սաբիրաբադում վերստին «մահ հայերին» կոչն է մարզադաշտ հասցրել «պատվախնդիր» ջարդարարներին, որոնք մտադրված են եղել քարածեծ անել «հայի աներ-հայրիկ» Ջամիլ Հասանլիին, բայց տուժել են ադրբեջանցի լրագրողները:

Երեւույթը գուցե դաս լինի նույն այդ լրագրողների համար, որոնք Ադրբեջանում հայատյացություն սերմանելու գործում իշխող վարչախմբից ոչնչով հետ չեն մնում: Իսկ որ իլհամալիեւյան ռեժիմը քաղաքական ընդդիմախոսների դեմ ֆիզիկական հաշվեհարդար կազմակերպելիս իբրեւ «արդարացում» շրջանառում է նրանց «հայկական հետքը», Ադրբեջանում քսենոֆոբիայի եւ ռասիզմի ցցուն վկայությունն է:

Մանրամասները` «Ազգ»-ի այսօրվա համարում: