Օգրինչուկն ու երիտասարդական նվագախումբը կներկայացնեն Շտրաուսի և Ստրավինսկու ստեղծագործությունները

Հոկտեմբերի 5-ին տեղի ունեցավ մեծահամբավ հոբոյահար, բազմաթիվ միջազգային մրցույթների հաղթող Ալեքսեյ Օգրինչուկի (Ռուսաստան) և Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի մամուլի ասուլիսը։ Բանախոսները ներկայացրին այսօր երեկոյան «Արամ Խաչատրյան» համերգասրահում տեղի ունենալիք համատեղ համերգը, որն իրականացվում է Արամ Խաչատրյանի անվան միջազգային փառատոնի շրջանակներում։

Սերգեյ Սմբատյանը նշեց, որ ինքն Ալեքսեյ Օգրինչուկի հետ համագործակցության փորձ ունի. առաջին անգամ հանդիպել են 2011 թվականին, սակայն Հայաստանի պետական երիտասարդական նվագախմբի հետ Ա. Օգրինչուկը հանդես է գալիս առաջին անգամ։ Համերգին կներկայացվեն Շտրաուսի և Ստրավինսկու ստեղծագործությունները։ Սերգեյ Սմբատյանը նկատեց, որ փողային գործիքներն այսօր մեծ պահանջարկ ունեն աշխարհում, իսկ ինքը՝ Ալեքսեյ Օգրինչուկը, պահանջված ու զբաղված երաժիշտ է։

Ալեքսեյ Օգրինչուկը տեղեկացրեց, որ արդեն փորձեր ունեցել է Հայաստանի պետական երիտասարդական նվագախմբի հետ, և բարձր գնահատեց երիտասարդ հայ երաժիշտների մասնագիտական վարպետությունը։ ՙՄենք շատ լուրջ ստեղծագործություն ենք կատարելու, Սերգեյը շատ լավ և բարդ ծրագիր է ընտրել, ինչն ազդակներ է հաղորդում երիտասարդ երաժիշտներին՚,- ասաց երաժիշտը։ Նա տեղեկացրեց, որ ինքը երաժշտական ընտանիքից է, ծնողները դաշնակահարներ են, և որոշել են, որ Ալեքսեյը փոքր հասակից պետք է զբաղվի երաժշտությամբ։ 6 տարեկանից դաշնամուր է նվագում, 9 տարեկանից՝ հոբոյ։ Ընդ որում, հոբոյն ընտրել է հենց ինքը։ «Ես փոքր հասակից այցելում էի տարբեր համերգների, լսում սիմֆոնիկ, օպերային, կամերային երաժշտություն, և միշտ նվագախմբում տարբերում ու ընտրում էի հատկապես հոբոյի ձայնը։ Շատերը խորհուրդ չէին տալիս ինձ զբաղվել հոբոյով։ Հոբոյը գործիքների արքան է, բայց միևնույն ժամանակ այն ֆիզիկապես ամենածանրն է, ինչը պայմանավորված է ձայնարտադրության հետ։ Հոբոյը քմահաճ, բայց միևնույն ժամանակ շատ գեղեցիկ գործիք է»,-ասում է Ալեքսեյ Օգրինչուկը։ Նա նաև նկատում է, որ շատ լավ տեղյակ է Արամ Խաչատրյանի երաժշտությանը, թեև երբևէ չի նվագել։

Ալեքսեյ Օգրինչուկն ավարտել է Փարիզի կոնսերվատորիան։ Մի շարք միջազգային մրցույթների դափնեկիր է։ 13 տարեկանում արդեն հասցրել էր ելույթներ ունենալ ողջ Ռուսաստանում, Եվրոպայում և Ճապոնիայում: Նա մի շարք միաջազգային մրցույթների մրցանակակիր է, որոնց թվում է Ջենովայի հեղինակավոր CIEM միջազգային մրցույթը, որին նա մասնակցել է 19 տարեկանում: Նա արժանացել է նաև Եվրոպական «Յուվենտուս» մրցանակին 1999թ., Ֆրանսիայի Victoires de la Musique Classique-ի երկու մրցանակին 2002-ին, Ռուսաստանի «Տրիումֆ» մրցանակին 2005-ին և հաղթել է Borletti Buitini Trust Award-ը 2007-ին: Նա հեղինակավոր Rising Stars-ի և BBC New Generation Artists Programmes-ի մասնակից է եղել:

2005-ից Ալեքսեյ Օգրինչուկը Ամստերդամի Կոնցերտգեբաուի թագավորական նվագախմբի մենակատար է։ 2011թ. սեպտեմբերին Ալեքսեյ Օգրինչուկը Ջենովայի Haute Ecole de Musique-ում հոբոյի պրոֆեսորի կոչում է ստացել: Նա նաև հրավիրվել է դասավանդելու Լոնդոնի երաժշտական թագավորական ակադեմիայում 2001թ-ից, Սան Սեբաստիանի Musikene-ում 2009-ից և Հաագայի թագավորական կոնսերվատորիայում 2010թ-ից: Նա վարպետության դասեր է տալիս Pablo Casals կամերային երաժշտության ակադեմիայում, Mahler ակադեմիայում, Villecroze-ի երաժշտական ակադեմիայում: