Մենք լրջորեն կրակն ենք ընկել, որ Տիգրան Սարգսյանը բանկում է աշխատել. Հրանտ Բագրատյան

«Մենք լրջորեն կրակն ենք ընկել, որ Տիգրան Սարգսյանը բանկում է աշխատել… Նա ներմուծող օլիգարխներից սարքում է ֆինանսական օլիգարխներ։ Միակ բանը, որ այդ մարդը արեց այդ, կեղտոտ օլիգարխիկ համակարգը նաև ֆինանսացրեց՝ ֆինանսաօլիգարխիկ դարձրեց։ Բացառությամբ 4 բանկի, մնացած բանկերը պատկանում են այդ օլիգարխիկ խմբերին», – կառավարության ստվերային տնտեսության դեմ պայքարի մասին կարծիք հայտնեց ՀՀ նախկին վարչապետ, ՀԱԿ անդամ Հրանտ Բագրատյանը։ «Դուք կարծում եք՝ ստվերի դեմ են պայքարու՞մ, ամենևին»,– ասաց նա։ 

«ՀԴՄ–ները մտցրեցին... Դուք կարծում եք առևտրում հարկերի տեսակարար կշիռը բարձրացա՞վ... Ստվերային տնտեսության գործակցի ցուցանիշներով 151 երկրից 124–րդ տեղում ենք»,– նշեց Բագրատյանը՝ վկայակոչելով "Transparency International"-ի հրապարակած տվյալները 2011թ.–ի համար։ Այս տարի ստվերային տնտեսության ընդհանուր ցուցանիշը ՝ 47% է, իսկ 1996թ.–ին, երբ վարչապետի պաշտոնը զբաղեցնում էր Բագրատյանը, այդ ցուցոանիշը հավասար է եղել 42%–ի։ «Ի՞նչ եք կարծում, 96–ի համեմատ ստվերը ավելացել է, թե պակասել», – հարցրեց Բագրատյանը։  

Նախկին վարչապետը անդրադարձավ նաև «բոլորին  հուզող» մեկ այլ հարցի՝ տեխզննմանը։ «Այ մարդ, գոյություն ունի ապահովագրություն, էլ ինչ տեխզննում։ Եթե մեքենան ապահովագրված է, ի՞նչ տեխզննման մասին կարող է խոսք լինել, չէ՞ որ մեքենա ապահովագրողը պիտի զններ այդ մեքենան, նոր ապահովագրեր»,– նշեց նա։ Ըստ Բագրատյանի, ի վերջո, Ռուսաստանի այդ քայլին դիմելուց հետո, Հայաստանում ևս տեխզննումը կներառեն ԱՊՊԱ–ի մեջ և դա կներկայացնեն որպես «ռեֆորմատորական քայլ»։  Իսկ այդ քայլը, ըստ Բագրատյանի, իրենք հուշում էին դեռ շատ առաջ։