Երիտհայրենասերների ցասումը. ովքե՞ր են իրականում պառկել թուրքերի տակ

Ստացվում է, որ կամա թե ակամա Զարուհի Փոստանջյանի թեմայի հետ ասոցացվում է այն, ինչ պետք է գրեմ, սակայն երևույթը իշխանական քարոզչամեքենայի կողմից այնպես է լղոզվել, որ անհրաժեշտ է մի քանի շեշտադրումներ անել: Ինչպես Փոստանջյանի հայտնի հայտարարության վերամբարձ քննարկումների ժամանակ արվեց, բոլորը սկսեցին խոսել հայրենիքի և թուրքի շահի մասին` շրջանառության մեջ գցելով թուրքի տակ պառկելու և նմանատիպ մառազմատիկ մտավարժանքներ: Մինչդեռ տարիներ շարունակ ոչ մեկը չի խոսում թուրքի տակ պառկելու մասին, երբ խոսքը վերաբերում է հենց մեր պետության ներսում թշնամու հետ կենակցելու գրեթե ամենօրյա երևույթներին:

1999 թվականի հոկտեմբերի 27-ի դեռ լիարժեքորեն չբացահայտված առեղծվածը, կատարված քննությունը, օդում կախված հարցականները երբևէ պաթետիկ հայրենասերների մտավոր պարապմունքների համար նյութ չհանդիսացա՞ն, թե ով պառկեց թուրքի տակ և գլխատեց Հայաստանի Հանրապետությունը:

Երբ օրը ցերեկով սրճարաններից մեկի զուգարանում երկրի նախագահի թիկնապահը սպանեց ՀՀ անմեղ քաղաքացուն, հավերժ կոմսոմոլներից որևէ մեկը աղմկե՞ց, որ այդ քայլով պառկեցին մեր թշնամու տակ:

Երբ 2008 թվականի հետընտրական զարգացումներից հետո ՀՀ զինված ուժերը, մարտական բարձր պատրաստականությամբ, ամենաբարձր մակարդակով արված հրամանի արդյունքում սահմաններից քշվեցին մայրաքաղաքի կենտրոն, թուրքի տակ պառկելու տարրեր չկայի՞ն արդյոք:

Երբ նույն թվականի մարտի 1-ին ՀՀ 10 անմեղ քաղաքացիներ գնդակահարվեցին իրենց հետընտրական քաղաքացիական բողոքը արտահայտելու ժամանակ, հետաքրքիր է իմանալ` ով ում տակ պառկեց:

Երբ ապաշնորհ տնտեսական քաղաքականություն վարելու պատճառով Հայաստանից օրական արտագաղթում է մոտ մեկ գյուղի չափ բնակչություն, երիտհայրենասերները ինչո՞ւ չեն նայում թուրքի տակ` տեսնելու, թե ով է այնտեղ պառկած:

Եթե թուրքերի հետ կենակցումների ամբողջ շարքը թվարկեմ, համացանցը կոչնչանա գեգաբայթերի ծանրությունից, որովհետև ոչ մի ինֆորմացիոն կրիչ չի կարողանա տեղավորել երիտթուրքահպատակների ողջ էրոտիկ ֆանտազիան:

Իսկ եթե որևէ հակաիշխանական գործիչ, թեկուզ էթիկապես սխալ քայլ անելով, համարձակվում է այլախոհություն դրսևորել, ոմանք առանձնահատուկ կրքով սկսում են փորփրել թուրքի տակը: Դրանով նրանք ավելի են նվաստացնում Հայաստանի հեղինակությունը: Ստացվում է, որ Հայաստանում բոլոր ընդդիմադիրները թուրքերի համար են աշխատում:

Բավական է հանուն սեփական իշխանության թշվառ և անհրապույր գոյության` անընդհատ հղումներ անել մեր թշնամիներին: Եվ միշտ հիշեք, թե ով է ավելի լավ աշխատում թուրքերի համար:

Ինչպես հայտնի ասացվածքն է ասում, նախ սեփական ծառը ջրեք, հետո նոր` ուրիշի...

Վարուժան Բաբաջանյան