Ինչի՞ն է սպասում «Արցախբանկը» (տեսանյութ)

Ինչպես ավելի վաղ տեղեկացրել էր Լուրեր.com-ը, այսօր Դավիթաշենի այգու դիմաց կառուցված շենքի սեփականատերերը բողոքի ակցիա էին անցկացնում «Արցախբանկի» դիմաց: Մոտ 100 քաղաքացի բանկից պահանջում էին պատասխանել, թե ինչու չեն արձագանքում շենքի հետ կապված խնդրին:

Արդեն տևական ժամանակ է, ինչ թեժ իրավիճակ է ստեղծվել Դավիթաշեն համայնքի 2-րդ թաղամասում` «Տոնուս» շինարարական ընկերության կողմից կառուցվող 44/4 բազմաբնակարան բնակելի շենքի շուրջ:

Նշենք, որ շինարարական ընկերությունը պատկանում է ԲՀԿ-ական Աշոտ Տոնոյանին: Քաղաքացիները պահանջում են իրենց տրամադրել օրինական ճանապարհով «Տոնուս» ՍՊԸ-ից ձեռք բերած բնակարանները։ 2006 թվականից 140 ընտանիք «Տոնուս Քոնսթրաքշնս» ՍՊԸ-ի հետ կնքել է անշարժ գույքի առքուվաճառքի նախնական պայմանագիր, կատարել պարբերական վճարումներ` վերը նշված բազմաբնակարան շենքում բնակարան ձեռք բերելու նպատակով: Սակայն վերջերս բնակիչներին հայտարարել են, որ իրենք բնակարանների նկատմամբ իրավունքներ չունեն, քանի որ շենքը գրավ է դրված «Արցախբանկ» ՓԲԸ-ում։

Արդեն 1 ամիս շարունակ տեղի ունեցող դատական նիստերին ևս բանկից որևէ ներկայացուցիչ ներկա չի եղել: Բանկը նաև հրաժարվում է արձագանքել առողջացման ծրագրին:

Այսօր տեղի ուենցած ակցիայի ընթացքում բնակիչները հանդիպեցին բանկի ներկայացուցչի հետ: Վերջինիս խոսքերով` բանկը շենքը գրավից ազատել-չազատելու խնդիր չունի, քանի որ գործընթացն անցել է սնանկության կառավարչի ձեռքի տակ:

Առավել մանրամասն` Լուրեր.com-ի պատրաստած տեսանյութում.