Այսօր դիրիժոր Կոստանդին Սարաջյանի ծննդյան օրն է (լուսանկար)

«… երբ արեցի նրա դիմանկարը, նա կեցվածք չընդունեց իմ առաջ, իսկ ես «չպատճենեցի»: Ես արդեն գիտեի նրան իբրև մարդու, ծանոթ էի նրա հոգեկան աշխարհին, հետաքրքրություններին, նրա խառնվածքին ու բնավորությանը: Երբ նա գալիս էր իմ արվեստանոցը, մենք սովորականի պես զրուցում էինք ամենատարբեր նյութերի շուրջ: Նա հիանալի պատմող էր և կարողանում էր լավ լսել: Տաք, հրապուրվող բնավորության տեր լինելով, նա բոլորովին մոռանում էր դիմանկարի և, ինչ խոսք, որևէ կեցվածք ընդունելու մասին: Աշխատել եմ Կոստանդին Սոլոմոնովիչին կերպարել նաև և առաջ իբրև ներքին մեծ ոգեշնչման տեր մարդու, իբրև խոր ու նրբազգաց երաժշտի: Ես ձգտել եմ այդ բանը հաղորդել նրա ողջ կերպարանքի և առանձնապես խոհուն, ասես թախիծով մշուշված և միաժամանակ արտահայտիչ, չափազանց պլաստիկ ձեռքերի միջոցով»:

Մարտիրոս Սարյան

Դիրիժոր Կոստանդին Սարաջևը (Կոնստանտին Սարաջյան) ծնվել է 1877 թ. հոկտեմբերի 9-ին Դաղստանի Դերբենդ քաղաքում: 1898 թ. ավարտել է Մոսկվայի կոնսերվատորիայի ջութակի բաժինը:

1900 թվականիից աշխատել է Մոսկվայի ռուսական օպերային նվագախմբում` որպես կոնցերտմեյստեր:

1904-06թթ. Լայպցիգում Ա. Նիկիտայի մոտ սովորել է դիրիժորություն:

1918-19թթ. ստեղծել է Սարատովի, Դոնի Ռոստովի սիմֆոնիկ նվագախմբերը, եղել է սևծովյան նավատորմի նվագախմբի դիրիժորը: Այդ տարիներին թատրոնի ղեկավարները ձգտում էին իրենց բեմադրությունների մեջ ներգրավել արվեստում նոր ուղղություններով հետաքրքրվող տաղանդավոր, որոնող երաժիշտների: Նրանց ուշադրության կենտրոնում էր Կ. Սարաջևը: Իսկ երիտասարդ Սարաջևը արդեն մի քանի տարի Սոկոլնիկում տրվող սիմֆոնիկ համերգների դիրիժորն էր եղել և համընդհանուր ուշադրություն գրավել իր համերգների հետաքրքիր ծրագրերով:

1918 թվականից զբաղվել է մանկավարժությամբ, եղել է պրոֆեսոր: 1924-35 թթ գլխավորել է Մոսկվայի ոչ պետական սիմֆոնիկ նվագախումբը, որը 1926 թվականից կոչվել է Սարաջևի անվան: Նրա դիրիժորությամբ առաջին անգամ հնչել են Մայակովսկու, Պրիկոֆևի, Շոստակովիչի ստեղծագոործությունները:

1922-35թթ. եղել է Մոսկվայի պետական կոնսերվատորիայի դիրիժորական բաժնի ղեկավարը:

1935 թվականից տեղափոխվել է Երևան: Մինչ 1939 թ. եղել է Երևանի Սպենդիարյանի անվան օպերայի և բալետի թատրոնի գլխավոր դիրիժորը, հետագայում` Հայֆիլհարմոնիայի գեղարվեստական ղեկավարն ու գլխավոր դիրիժորը:

1941-ից ղեկավարել և դիրիժորել է Հայաստանի սիմֆոնիկ նվագախումբը:

1940-54թթ. եղել է Երևանի Կոմիտասի անվան պետական կոնսերվատորիայի ռեկտորը և դասավանդել:

Մահացել է 1954 թ. հուլիսի 22-ին, Երևանում:

Դիրիժոր Կոստանդին Սարաջևի դիմանկարը, 1940 թ.