Պոլիտեխնիկի ռեկտորը ամեն կերպ խուսափում է դասախոսների հետ հանդիպումից

Օրեր առաջ հայտնի դարձավ, որ Հայաստանի պետական ճարտարագիտական համալսարանում իջեցվել են դասախոսների աշխատավարձերը, փոխարենն ավելացվել են դասախոսների պարտավորությունները:

Lurer.com-ի հետ զրույցում ՀՊՃՀ Ֆիզիկայի ամբիոնի վարիչ Աշոտ Խաչատրյանը նշեց, որ ռեկտորի կողմից աշխատավարձերի իջեցումն ու ծանրաբեռնվածության ավելացումը հիմնավորված չէ:

«Մենք ուզում ենք պայքարել դրա դեմ, որովհետև համարում ենք այն չհիմնավորված: Ռեկտոր-կոլեկտիվ հանդիպման համար նիստ ենք խնդրել, որի համար մոտ 190 ստորագրություն այսօրվա դրությամբ հավաքվել է: Կան ամբիոններ, ֆակուլտետներ, որոնք ընդհանապես չեն ստորագրել, և դա ռեկտորի ազդեցության արդյունքն է», - ասաց Խաչատրյանը:

Վերջինիս խոսքերով՝ ռեկտոր-կոլեկտիվ հանդիպումը նշանակված է հոկտեմբերի 10-ին` 14:30-ին` նիստերի դահլիճում, սակայն այսօր նրանք ստացել են մեկ այլ հայտարարություն առ այն, որ այդ նույն օրը` նույն ժամին և նույն դահլիճում, նշանակվել է նաև ռեկտորատի նիստ:

«Ռեկտոր-կոլեկտիվ հանդիպման նիստը մենք ռեկտորի խնդրանքով հոկտեմբերի 14-ից տեղափոխել ենք ամսի 10-ին: Ստացվում է, որ այդ նույն օրը` նույն ժամին, երկու ժողով պետք է լինի: Ռեկտորատի ժողովուրդը առանձին է գալիս այդ դահլիճ, և կոլեկտիվն էլ գալիս է նույն դահլիճ: Երկու ժողով` մեկ դահլիճում է ստացվում: Այնպիսի տպավորություն է, որ ամեն կերպ չեն ուզում` կոլեկտիվի նիստ լինի: Քիչ է մնում` գնանք կողքի համալսարաններից դահլիճ խնդրենք», - ասաց ամբիոնի վարիչը:

Աշոտ Խաչատրյանը նշեց, որ կոլեկտիվը ունի խնդիրներ, որոնք պետք է քննարկվեն ռեկտորի հետ: Վերջինս ևս հայտարարել է, որ ինքը պատրաստ է և ցանկանում է հանդիպել կոլեկտիվի հետ, բայց իր այս քայլով նախատեսված նիստը ձախողում է։

«Անտրամաբանական բան է ստացվում», - ասաց Խաչատրյանը: