Պատահար Գյումրիում. վարորդը տեղափոխվել է հիվանդանոց

Հոկտեմբերի 11-ին, ժամը 02.44-ին ահազանգ է ստացվել, որ Շիրակի մարզի Գյումրի քաղաքի Շիրակացի փողոցում' «Ռոյալ» խանութի մոտակայքում, տեղի է ունեցել ՃՏՊ. կան տուժածներ, անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Դեռևս չբացահայտված հանգամանքներում «Մերսեդես E240» մակնիշի 35 OR 204 պետհամարանիշի ավտոմեքենան դուրս է եկել ավտոճանապարհի երթևեկելի հատվածից և հարվածել շինության պատին, ինչի հետևանքով վարորդ' 1988 թ. ծնված Հ. Բ.-ն արգելափակվել է ավտոմեքենայի մեջ:

Հրշեջ-փրկարարները Հ. Բ.-ին դուրս են բերել ավտոմեքենայից, ով տեղափոխվել է Գյումրի քաղաքի բժշկական կենտրոն:

Ըստ բժիշկների՝ տուժածի առողջական վիճակը միջին ծանրության է:

Հրշեջ-փրկարարները հոսանքազրկել են ավտոմեքենան և դադարեցրել վառելիքի արտահոսքը: