ԵԽԽՎ պատվիրակության արդարացման ասուլիսը

«Հրապարակ»-ը այսօրվա խմբագրականում գրում է.

«ԵԽԽՎ պատվիրակության անդամները երեկ, ըստ էության, արդարացման ասուլիս էին հրավիրել: Փոստանջյանի՝ ԵԽԽՎ ամբիոնից հնչեցրած աղմկահարույց հարցից հետո բազմաթիվ հարցեր առաջ եկան՝ ով է հարց տալու իր իրավունքը զիջել Փոստանջյանին, ինչու է զիջել, ինչու չեն պարզել, թե նա ինչ հարց է տալու: Երեկ պարզվեց, որ Փոստանջյանին հարց տալու իրավունք տրվել է պատվիրակության ղեկավար Դավիթ Հարությունյանի իմացությամբ և թույլտվությամբ՝ ժողովրդավարությունից դրդված:

«Ինձ հարցնում են՝ իսկ ինչո՞ւ ձայն տվեցիք Զարուհի Փոստանջյանին: Ես ժողովրդավարությունն այդպես եմ հասկանում: Ամեն մարդ մի ձև է հասկանում, Զարուհի Փոստանջյանն այլ ձևով է հասկանում, նա ժողովրդավարությունը հասկանում է այնպես, որ պետք է նման հարց տա: Ես ոչ թե բարի պատվիրակության ղեկավար եմ, ուղղակի արել եմ այն, ինչը թելադրել է մեր երկրի ոգին, ժողովրդավարությունը»,- ասել է Դավիթ Հարությունյանը: Նա ձեռնպահ է մնացել Զարուհի Փոստանջյանին ԵԽԽՎ հայաստանյան պատվիրակության կազմից հանելու վերաբերյալ հարցին անդրադառնալ՝ հարցը համարելով ԱԺ նախագահ Հովիկ Աբրահամյանի իրավասությունների շրջանակում: Միայն ընդգծել է, որ Փոստանջյանին հեռացնելու հարց չկա, փոփոխությունը կլինի ռոտացիայի հիման վրա, ինչից հետևում է, որ Հովիկ Աբրահամյանն իրականում շտապեց ԱԺ ամբիոնից Փոստանջյանին հեռացնելու մտադրության մասին հայտարարություն անելիս: Հետո թերևս նրան այդ մասին ասացին, և դա էր պատճառը, որ այդ դիմումը, ըստ սահմանված կարգի, դեռ չի հասել «Ժառանգություն» խմբակցությանը: ԵԽԽՎ հայաստանյան պատվիրակության նոր կազմը, ըստ ամենայնի, կձևավորվի հունվարի սկզբին, և, Դոնթի բանաձևի ռոտացիոն սկզբունքի համաձայն, Փոստանջյանին պատվիրակության կազմում կփոխարինի ՕԵԿ-ական Մհեր Շահգելդյանը:

Մանրամասները` «Հրապարակ»-ի այսօրվա համարում: