Գաֆէսճեանում կբացվի «Դագ Արգյու. գեղանկարներ հավերով» ցուցադրությունը

«Դագ Արգյու. գեղանկարներ հավերով» ցուցադրության հանդիսավոր բացումը կկայանա 2013թ. հոկտեմբերի 12-ին՝ ժամը 18:00-ին, Գաֆէսճեան արվեստի կենտրոնի «Արծիվ» սրահում: Ցուցադրությունը ներկայացնում է ժամանակակից ամերիկացի արվեստագետ Դագ Արգյուի չորս մոնումենտալ ստեղծագործությունները, այդ թվում նրա հայտնի «Անանուն» հավերով գեղանկարը:

Դագ Արգյուն իր կտավների երկչափ հարթության սահմաններում ձգտում է պատկերել անսահմանությունը՝ ստեղծելով մեծադիր կտավներ, որոնցում սովորական օբյեկտները ներկայանում են մոնումենտալ և վերաիմաստավորված կերպերով՝ արտահայտելով ժամանակակից սոցիումի բազմաշերտ իրականությունը:

Ջերարդ Լ. Գաֆէսճեան հավաքածուին պատկանող «Անանուն» հավերով գեղանկարը և երեք հավերի դիմանկարները ներկայացնում են Դագ Արգյուի ստեղծագործական կարևորագույն շարքերից մեկը: Բծախնդրորեն պատկերված անհեթեթ կեցվածքներով կենդանիները իրենց գերիշխող ներկայությամբ ներքաշում են դիտողին ստեղծագործությունների լայնիմաստ ենթատեքստի մեջ:

«Մինչ Հայաստան ժամանելը, «Անանուն» հավերով գեղանկարը հանրային բուռն քննարկումների էր արժանացել Ուայզմեն արվեստի թանգարանում, երբ Ջերարդ Գաֆէսճեանը 1995 թվականին այն ցուցադրության էր հանձնել Մինեսոտայի համալսարանին: Համոզված ենք, որ Դագ Արգյուի աշխատանքները հայ հանրության համար ժամանակակից ամերիկյան արվեստի նոր միտումներ կբացահայտեն», - նշեց Գաֆէսճեան արվեստի կենտրոնի գործադիր տնօրենի ժամանակավոր պաշտոնակատար Վահագն Մարաբյանը:

Դագ Արգյուն ծնվել է 1962 թվականին Մինեսոտա նահանգի Սենթ Փոլ քաղաքում: Նրա աշխատանքներն ընդգրկված են բազմաթիվ հանրային հավաքածուներում, այդ թվում Ուոքեր արվեստի կենտրոնում, Մինեսոտայի Ամերիկյան արվեստի թանգարանում, Մինեապոլիսի արվեստի ինստիտուտում, ինչպես նաև Ֆրեդերիկ Ուայզմեն արվեստի հիմնադրամում: 2009 թվականին Լոնդոնի ստեղծագործական մրցույթում Արգյուն ճանաչվել է տարվա արվեստագետ: Նա արժանացել է այնպիսի պատվավոր մրցանակների, ինչպիսին են Հռոմի մրցանակը, արվեստի ազգային անվանական կրթաթոշակը, Բուշ և Փոլոք-Կրասներ հիմնադրամների դրամաշնորհները: Դագ Արգյուն ներկայումս ապրում է Նյու Յորքում:

Ցուցադրության հանդիսավոր բացման մուտքը՝ հրավիրատոմսերով:

«Դագ Արգյու. գեղանկարներ հավերով» ցուցադրության հանրային բացումը տեղի կունենա հոկտեմբերի 13-ին ժամը 10:00-ին: Այդ օրը մուտքը «Արծիվ» սրահ կլինի անվճար: Ցուցադրության կտևի մինչև դեկտեմբերի 29-ը: