Վարդան Մինասյան. «Փառք Աստծո, որ սադրանքների չգնացինք»

Հայաստանի հավաքականի գլխավոր մարզիչ Վարդան Մինասյանը, Բուլղարիայի նկատմամբ 2:1 հաշվով տարած հաղթանակից հետո, հարցազրույց տվեց լրագրողներին:

- Ինչպե՞ս կգնահատեք խաղը:

- Ես երեկ ասացի, որ այսօր իմ համար կարեւորը հաշվին է: Իսկ մնացածն էական չէ: Առաջին խաղակեսում մրցակցի ստացած կարմիր քարտը նույնիսկ խանգարեց մեզ…

- Արազի վնասվածքը լու՞րջ է:

- Հուսով եմ, որ կխաղա: Միայն Արազը չէ, Ռոբերտ Արզումանյանն էլ վնասվածք ստացավ:

- Երկրորդ խաղակեսի մեկնարկն ինչո՞ւ չստացվեց:

- Կարծես չար կատակ լիներ… կարմիր քարտից հետո կարծեցինք, թե հեշտ է լինելու, բայց ես ընդմիջմանը ասել էի, որ մրցակցի կարմիրը չի նշանակում, թե հաղթանակն ապահովված է: Սարկիսովը եւ Ղազարյանը եզրերում լավ չէին գործում, ինչի արդյունքում վտանգավոր գրոհներ շատ էինք բաց թողնում:

- Իտալիային հաղթելու շանս կա՞:

- Իհարկե, կա: Չեմ կարող իտալացիների փոխարեն պատասխանել, սակայն նրանք էլ վարկանիշի համար են պայքարում, որ մնան առաջին զամբյուղում: Նրանք մոտիվացիայի պակաս չեն ունենա:

-Կամո Հովհաննիսյանն իր եզրում հաճախ չէր հասցնում եւ մրցակիցը վտանգավոր գրոհներ էր ձեռնարկում...

- Սարկիսովը նրան քիչ էր օգնում: Ես Կամոյին ասացի, որ ավելի լայն կանգնի:

- Երկրպագուները օգնեցի՞ն:

- Բնականաբար, օգնեցին:

- Մովսիսյանը նախորդ տարի ավելի էր նահանջում եւ սուր փոխանցումներ կատարում…

- Յուրայի որակները գիտեք՝ նրան պետք է տարածություն: Այսօր նման տարածություն չկար: Նա խելացի խաղացող է, որ անընդհատ փորձում էր տարածություններ գտնել:

- Նախապես զգուշացրե՞լ էիք, որ սադրանքների չգնան:

- Ես երեկ էլ ասել էի, որ կարեւորը ֆուտբոլ խաղանք: Փառք Աստծո, որ սադրանքների չգնացինք: Դրա կարիքն էլ չկար:

- Եթե չլիներ երկրորդ հենակետայինի խնդիրը, այսպիսի մարտավարությո՞ւն էիք ընտրելու:

- Այո, քանի որ ցանկանում էինք անակնկալ մատուցել Բուլղարիային:

- Հայաստանի հետ երկրորդ տեղի համար պայքարող թիմերից ու՞մ եք համակրում:

- Ինձ ավելի դուր է գալիս Դանիան՝ Հայաստանից հետո: Նրանք ամեն ինչով բարձր էին. թե Չեխիայից, թե առավել եւս Բուլղարիայից:

- Վանգայի նկարը օգնե՞ց:

- Ուշադրություն չեմ դարձրել:

Աղբյուրը`armsport.am