Պատմություն վթարված ավտոբուսի, մարդասիրության և սպայի պատվի մասին (ֆոտո)

Հատված ԱԻՆ տեղեկագրից

Օգոստոսի 23-ին` ժամը 09:21-ին, ՀՀ ԱԻՆ ճգնաժամային կառավարման կենտրոնում ահազանգ էր ստացվել, որ Երևան-Դիլիջան ավտոճանապարհի 86-րդ կմ-ում տեղի է ունեցել ՃՏՊ, կան տուժածներ և անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Տեղում պարզվել է, որ «ՊԱԶ» մակնիշի 62 SL 361 պետհամարանիշի ավտոբուսն անհայտ հանգամանքներում դուրս է եկել ճանապարհի երթևեկելի մասից և գլորվել ձորը:

Մինչ հրշեջ-փրկարարների ժամանումը` ավտոբուսում գտնվող Արմավիրի մարզի Փարաքար գյուղի հիմնական դպրոցի տնօրենը և ուսուցիչները (18 մարդ) տեղի ուժերով դուրս են բերվել վթարված ավտոբուսից և տեղափոխվել Դիլիջանի բժշկական կենտրոն:

Ըստ բժիշկների' տուժածներից երկուսի առողջական վիճակը ծանր էր, մյուսներինը՝ միջին ծանրության:

Հրշեջ-փրկարարները հոսանքազրկել են ավտոբուսը և դադարեցրել գազի արտահոսքը:

Պատմում է տուժածներին առաջինն օգնության հասած ոստիկանը

ՀՀ ոստիկանության քննչական գլխավոր վարչության Տավուշի մարզի քննչական բաժնի Տավուշի քննչական բաժանմունքի ավագ քննիչ, ոստիկանության կապիտան Հունան Համլետի Գարանյանն այդ օրն առավոտյան անցնում էր նշված ճանապարհով ու, տեսնելով վթարի ենթարկված ավտոբուսը, առաջինն է օգնության ձեռք մեկնում վիրավորներին.

- Առավոտյան ժամը 9-ի կողմերն էր, մեքենայով Տավուշից Երևան էի գնում գործով… Դիլիջանի ոլորաններից մեկում հանկարծ մարդկանց ձայներ լսեցի, մի քիչ էլ առաջանալով՝ նկատեցի ավտոբուսը… Առաջին հայացքից թվում էր, թե ուղղակի հին ավտոբուսի կմախքը՝ «կուզովն» է մնացել ճանապարհի եզրին, բայց ավելի ուշադիր նայելով ու արդեն նկատելով ավտոբուսի անկման հետագիծը (վերևից թափված քարեր, ծառերի կոտրտված ճյուղեր)՝ հասկացա, որ ինչ-որ բան է տեղի ունեցել… Ավտոբուսը մոտ 100 մետրից գլորվել էր ներքև՝ մի ոլորանից մյուսը: Մոտեցա ավտոբուսին, տեսնեմ' մեջն ամեն ինչ խառնվել է իրար, նստարանները լրիվ ջարդվել են, ընկել մարդկանց վրա… Ըստ երևույթին՝ դեպքը նոր էր տեղի ունեցել, ու ավտոբուսի միջի մարդիկ էլ դեռ չէին հասկացել, թե ինչ է կատարվել: Փորձեցի մարդկանց քիչ-քիչ հանել ավտոբուսի միջից… Այդ ժամանակ արդեն ճանապարհով այլ անցնող մեքենաներ էլ կանգնեցին, բայց մարդիկ վախենում էին մոտենալ, երևի մտածելով, թե ավտոբուսի մեջ ողջ մարդ չի մնացել… Բջջային հեռախոսով զանգեցի վերջին հավաքածս հեռախոսահամարով (մեր պետերից մեկին) ու խնդրեցի շտապօգնություն կանչել: Մոտենալով ու տեսնելով, որ բոլոր ուղևորները ողջ են, սկսեցի հարցուփորձ անել, որ տեսնեմ` ով կարող է շարժվել կամ ինքնուրույն դուրս գալ: Ով չէր կարող, փորձում էի օգնել, զգույշ ու քիչ շարժելով, որ վնասվածքները չբարդացնեմ: Հագուստս լրիվ արյունոտվել էր… Հանում էի, պառկացնում գետնին՝ ինչքան հնարավոր է հարմար ու անվտանգ դիրք ապահովելով, գլխի տակ բան դնելով… Հիմնականում շոկի մեջ էին կամ քերծվածքներ էին ստացել, մի քանիսը ոնց-որ կոտրվածքներ ունեին: Ճիշտն ասած՝ չեմ էլ կարող ասել, թե քանի մարդ կար մեջը… Ավտոբուսը մետաղի ջարդոնի էր վերածվել: Մինչև շտապօգնության գալը՝ բոլորին հանեցինք ավտոբուսի միջից: Փրկարարները, ճանապարհային ոստիկանությունն էլ եկան: Համոզվելով, որ տուժածներին արդեն բուժօգնություն է ցուցաբերվում ու տեղափոխում են հիվանդանոց, ես շարունակեցի ճանապարհս:

Մեդալ՝ ԱԻ նախարարի կողմից

ՀՀ ԱԻ նախարար Արմեն Երիցյանը ոստիկանության սպայի պատիվը բարձր պահելու, անօգնական վիճակում հայտնված քաղաքացիների փրկությունը կազմակերպելու և իրականացնելու համար «Համագործակցություն հանուն փրկության» մեդալ է շնորհել ՀՀ ոստիկանության քննչական գլխավոր վարչության Տավուշի մարզի քննչական բաժնի Տավուշի քննչական բաժանմունքի ավագ քննիչ, ոստիկանության կապիտան Հունան Գարանյանին։