Պաղպաղակի շուկայում ուսումնասիրություններ կատարվել են այն ժամանակ, երբ «Նոյն իջավ տապանից»

«Գյուղատնտեսության նախարարության սննդի անվտանգության պետական ծառայությունը անցնող տարվա ընթացքում ոչ մի լուրջ բացահայտում չի արել», գնահատականը «Իրազեկ եւ պաշտպանված սպառող» ՀԿ-ի նախագահ Բաբկեն Պիպոյանինն է: Թեպետ ՀԿ-ն ցանկանում է համագործակցել տեսչության հետ, սակայն այս ցանկությունը միակողմանի է, եւ որեւէ արդյունք չի գրանցվում: Խնդիրն այն է, որ պաղպաղակի շուկայի հետ կապված ՀԿ-ի եւ տեսչության ջրերը մեկ առվով չեն հոսում: ՀԿ-ն պաղպաղակի շուկայում իրականացրել է հետազոտություններ եւ հայտնաբերել մակնշման հետ կապված խնդիրներ եւ կոչ արել սննդամթերքի անվտանգության պետական տեսչությանըՙ հիմք ընդունելով պաղպաղակների սխալ մակնշումը, իրականացնել դիտարկում եւ փորձաքննության ենթարկել պաղպաղակները: «Փոխադարձ երկկողմանի աշխատանքներ իրականացնելու փոխարեն սննդամթերքի անվտանգության պետական ծառայությունը հունիսի 28-ին, իր պաշտոնական կայքում տեղեկություն հրապարակեց, որ բացի «Շանթ»-ից որեւէ այլ ընկերություն խախտում չի արել», ասաց Բաբկեն Պիպոյանը:

Նա հավելեց, որ որոշ ժամանակ անց սննդի անվտանգության պետական տեսչությունը գրություն է ստացել, կայքում հայտարարել են, որ հանդիպել են պաղպաղակ արտադրող ընկերությունների հետ եւ խախտումները վերացնելու վերաբերյալ հանձնարարականներ տվել: «Փաստորեն երեք օրվա մեջ սննդի անվտանգության պետական տեսչությունն իրար հերքող հայտարարություններ է տարածում», ասաց Պիպոյանը:

Սննդի անվտանգության եւ որակի հսկողության տեսչության պետ Արման Արարատյանը կատարվածի առնչությամբ այլ բացատրություն է ներկայացնում. նրա խոսքերով, այն ընկերություններում, որտեղ շրջանառությունը 70 միլիոնը չի գերազանցում, ստուգումներ իրականացնելու համար հարկավոր է վարչապետից թույլտվություն ունենալ: Արարատյանի ներկայացմամբՙ իրենք պետք է գործեն համաձայն օրենսդրության, պետք է դիմեն եւ ստանան թույլտվություն հետազոտություններ անցկացնելու համար: «Սննդի անվտանգության ոլորտում չկա մի խնդիր, որը լուծվի մեկ շաբաթում: Հասարակության մեջ տպավորություն է ստեղծվում, որ մեզ ասում են, նոր ենք անում, բայց մեզ ասողը օրենսդրությունն է եւ մենք իրավունք չունենք շեղվելու դրույթներից», հակադարձեց Արարատյանըՙ անպատասխան թողնելով հարցըՙ ստուգումներ չէին կատարել, ինչու էին հայտարարել, որ բացի «Շանթ»-իցՙ մնացած ընկերությունները խախտումներ չեն արել: «Այնուամենայնիվ սննդի անվտանգության պետական ծառայությունը իր պարտավորությունները գրեթե չի կատարում, թերանում է իր աշխատանքում, իսկ ինչ վերաբերում է պաղպաղակի շուկայում ուսումնասիրություններ կատարելուն, «ապա դա եղել է այն ժամանակ, երբ Նոյն իջավ տապանից»:

Մանրամասները` «Ազգ»-ի այսօրվա համարում: