Այսօր «Թթենին» ֆիլմից հայտնի դերասան Ռազմիկ Արոյանի ծննդյան օրն է (տեսանյութ)

Դերասան Ռազմիկ Արոյանը ծնվել է 1947թ. հոկտեմբերի 15-ին Պարսկաստանի Թեհրան քաղաքում: Նախադպրոցական տարիքում հաճախել է Թեհրանում դեսպանատան թատերական խմբակ:

1967թ. տեղափոխվել է Հայաստան, ընդունվել Երևանի Սունդուկյանի անվան ազգային ակադեմիական թատրոնին կից գործող Աճեմյանի դպրոց-ստուդիա: Հենց սկզբից աչքի է ընկել դերասանական ձիրքով, եղել է Աճեմյանի սիրված ուսանողը: Ավարտելուց հետո, երկար տարիներ աշխատել է նույն թատրոնում: Այնուհետև աշխատել է «Նորքի երիտասարդական թատրոնում: Բեմում մարմնավորրել է բազմաթիվ հիշվող կերպարներ: Խաղացել է Գորկու «Հատակում» (Սատին), Սունդուկյանի «Պեպոյում» մարմնավորել է Կակուլիի կերպարը` Բ.Ներսիսյանի եւ Խ.Աբրահամյանի հետ: Նկարահանվել է շուրջ 30 գեղարվեստական եւ կարճամետրաժ հայկական ֆիլմերում: Նրան հատկապես մեծ համբավ է բերել «Թթենի» կարճամետրաժ ֆիլմը: Նկարահանվել է «Կոմիսար Մհերի արկածները», «Յոթ սարից այն կողմ», «Արևիկ», «Ամուր ապար», «Սպիտակ անուրջներ», «Մխիթար Սպարապետ», «Լիրիկական երթ», «Ձորի Միրոն» և այլ ֆիլմերում:

Կյանքի վերջին տարիներին ապրել է ծերանոցում: «Չէի պատկերացնի, որ կյանքս այսպես կդասավորվի: Հիմա մեջս լիքը ասելիք կա. կուտակվել է: Եթե մեկն ինձ դեր տար` կպայթեի, կխաղայի խենթի պես...»,- հարցազրույցներից մեկի ժամանակ ասել է դերասանը («Ուրբաթ report», 2008 թ.): Այդ օրերին նա երազել է կրկին բեմ վերադառնալ: Ու քանի որ այդ հնարավորությունը նրան ոչ ոք չի տվել, ստիպված երեխաներին ասմունքել է սովորեցրել կամ ասմունքել նրանց համար: Տունն ու ընտանիքը, շատ հարազատների կորցրած դերասանի համար հաճելի հուշն հիմնականում  «Թթենի» ֆիլմի նկարահանման պատմության հետ է կապված եղել. «Ինչ լավ օրեր էին... Մեկ ամիս տևեցին նկարահանումները, և կարծես մի ընտանիք լինեինք: «Թթենին» սկսվում ու ավարտվում է բարությամբ` մարդկանց ասելով` բարի եղեք միմյանց նկատմամբ. ապրե՛ք, էլի, թթի ծառը կա, միասին նստե՛ք, թո՛ւթ կերեք, ինչո՞ւ եք կռվում...»:

Կյանքի վերջին տարիներին դերասանին հաջողվում է կրկին լինել նկարահանման հրապարակում, նա նկարահանվել է «Ճակատագրի գերիները», «Որոգայթ»», «Դժբախտ երջանկություն» հեռուստասերիալներում:
Մահացել է 2010 թ. Երևանում, թոքերի քաղցկեղից: