Հանդիպել են Հայաստանի և Վրաստանի գյուղատնտեսության նախարարները

ՀՀ գյուղատնտեսության նախարար Սերգո Կարապետյանն այսօր ընդունել է Վրաստանի գյուղատնտեսության նախարար Շալվա Պիպիյայի ղեկավարած պատվիրակությանը: Հանդիպման ընթացքում վրացական կողմը հետաքրքրվել է մեր երկրում իրականացվող գյուղատնտեսական նոր քաղաքականությամբ, գյուղոլորտի այս տարվա ցուցանիշներով, համագործակցության ընդլայնման հնարավորություններով:

Նախարարը հյուրերին տեղեկացրել է, որ պետական աջակցության ծրագրերի ու բարենպաստ բնակլիմայական պայմանների արդյունքում, գյուղատնտեսական տարին բարեհաջող էր և ներկայացրել գյուղոլորտի բավականին տպավորիչ արդյունքները:

ՀՀ Գյուղատնտեսության նախարարը մասնավորապես նշել է . «Կարծում եմ՝ երկուստեք ներդրված ջանքերը պետք է նպատակաուղղվեն համագործակցության հետագա ամրապնդմանը: Ավանդաբար Հայաստանից Վրաստան են արտահանվել կարտոֆիլ, միրգ, բանջարեղեն և խաղող, իսկ Վրաստանից Հայաստան՝ ցիտրուսային մրգեր: Մեր երկրները ստորագրել են ազատ առեւտրի համաձայնագիրը, ինչը կոչված է օժանդակել դինամիկ առեւտրային հարաբերությանը եւ խոչընդոտներ չհարուցել մաքսային ճանապարհներին ապրանքների արտահանման եւ ներմուծման համար»,-ասել է ՀՀ գյուղատնտեսության նախարարը: Իր հերթին Վրաստանի գյուղատնտեսության նախարարը ներկայացրել է իր երկրի գյուղատնտեսական առաջանցիկ ծրագրերը՝ անդրադառնալով գյուղատնտեսական ռեսուրսների համատարած հաշվառմանը, ապահովագրական ծրագրերին, կոոպերացիային. «Վերջին ամիսներին առեւտրային բանկերը երկարաժամկետ վարկային ռեսուրսներ են տրամադրել նոր կազմավորվող գյուղատնտեսական կոոպերատիվներին աջակցելու նպատակով, և մենք արդեն ընդունել ենք գյուղատնտեսական կոոպերացիայի մասին օրենքը», - տեղեկացրել է Վրաստանի գյուղատնտեսության նախարարը: Հանդիպման վերջում կողմերը ևս մի անգամ շեշտել են հայ-վրացական տնտեսական կապերի ընդլայնման հնարավորությունը,իսկ Վրաստանի գյուղատնտեսության նախարար Շալվա Պիպիյան Հայաստանի գյուղատնտեսության նախարարին աշխատանքային այցով հրավիրել է Վրաստան:

ԳՆ հասարակայնության հետ կապերի բաժին