Վիլնյուսում քննարկվել են հայ-լիտվական մշակութային համագործակցության հեռանկարները

2013 թ. հոկտեմբերի 2-4-ը Լիտվայի մշակույթի նախարար Շարունաս Բիրուտիսի հրավերով ՀՀ մշակույթի նախարար Հ. Պողոսյանը գտնվել է Վիլնյուսում՝ քննարկելու հայ-լիտվական մշակութային համագործակցության հարցեր, ինչպես նաև՝ մասնակցելու Լիտվայի ազգային խորհրդարանում անցկացվող «Մենք նկարում ենք Հայաստանը» խորագրով մանկական նկարների մրցույթի 12 մրցանակակիրների պարգևատրման արարողությանը, նույնանուն ալբոմի շնորհանդեսին և Լիտվայի կինոյի, թատրոնի և պարի թանգարանում կազմակերպվող Սերգեյ Փարաջանովի աշխատանքների ցուցահանդեսի բացմանը:

Այցի շրջանակում կայացել է ՀՀ մշակույթի նախարար Հ. Պողոսյանի և Լիտվայի մշակույթի նախարար Շարունաս Բիրուտիսի հանդիպոումը, որի ժամանակ քննարկվել է «Հայաստանի Հանրապետության Կառավարության և Լիտվայի Հանրապետության Կառավարության միջև մշակույթի բանագավառում համագործակցության մասին» համաձայանգրի վավերացման գործընթացը, ինչպես նաև՝ երաժշտարվեստի, թատերարվեստի, գրահրատարակչության ոլորտներում երկկողմ համագործակցության ծրագրեր: Կողմերն անդրադարձել են նաև նոյեմբեր ամսին Լիտվայում կայանալիք «Հայկական կինոյի շաբաթ» ծրագրին, հստակեցրել անելիքները: Պայմանավորվածություններ են ձեռք բերվել հաջորդ տարի Հայաստանում «Լիտվան՝ հայ մանուկների աչքերով» խորագրով մանկական նկարչական մրցույթի անցկացման և երկու մրցույթների լավագույն աշխատանքների եռալեզու /հայերեն, լիտվերեն, անգլերեն/ պատկերագրքի հրատարակման, ինչպես նաև՝ լիտվական ֆիլմերի կինոազդագրերի ցուցահանդես և «Լիտվական կինոյի օրեր» կազմակերպելու ուղղությամբ: Կողմերը քննարկել են նաև Վիլնյուսի պետական համալսարանի գրադարանի նոր շենքում հնատիպ գրքերի կամ դրանց կրկնօրինակների ցուցահանդես կազմակերպելու հնարավորությունները, ինչպես նաև՝ ԵՄ շրջա­նակներում հնարավոր համագործակցության ձևաչափերը:

Այցի շրջանակում Հ. Պողոսյանն այցելել է Լիտվայի ազգային դրամատիկական թատրոն, Լիտվայի ազգային ֆիլհարմոնիա, Լիտվայի պատմամշակութային հուշարձան XIV դարի «Թրակայ» ամրոց, ինչպես նաև' հանդիպել Լիտվայի հայ համայնքի ստեղծագործական մտավորականության ներկայացուցիչների, մշակույթի և արվեստի գործիչների հետ: