Դատարանը մերժել է Խաչիկ Խաչատրյանի հայցադիումը` ընդդեմ «Ժողովուրդ»-ի

Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանը դատավոր Ռուբեն Ափինյանի նախագահությամբ մերժել է «X գրուպ» ընկերության սեփականատեր Խաչիկ Խաչատրյանի' «Ժողովուրդ» օրաթերթի եւ թղթակից Սոնա Գրիգորյանի դեմ ներկայացված հայցադիումը: Դատավորը նման վճիռ է կայացրել 9 ամիս տեւած դատաքննությունից հետո: Հիշեցնենք, որ «Ժողովուրդ» օրաթերթը գրել էր, թե ՀՀ գյուղատնտեսության նախարարության սննդի անվտանգության պետական ծառայությունը տուգանել է «X գրուպ»-ի նախագահ Խաչիկ Խաչատրյանին, քանի որ նրան պատկանող ԵԹՖ-ն ժամկետանց ձվեր է իրացրել հայկական շուկայում: Ընդ որում, լուրը գրելիս լրագրողը մեկնաբանությունների համար դիմել էր անձամբ Խաչատրյանին՝ ներկայացնելով երկու տեսակետ: Բայց հրապարակումից հետո Խաչատրյանը «վազել էր» դատարան' իբր իրեն զրպարտելու համար պահանջելով թերթին ու թղթակցին տուգանել 3 մլն դրամով:

Սակայն դատավոր Ռուբեն Ափինյանը, հուրախություն մեզ, գնահատել է «Ժողովուրդ» օրաթերթի կողմից ցուցաբերված լրագրողական բարեխղճությունը եւ օբյեկտիվությունը: Ավելին, երեկվա վճռով, ըստ էության, Ափինյանն ապացուցեց, որ «Ժողովուրդ» օրաթերթը ճշմարտությունն էր հրապարակել՝ գրելով, որ Խ. Խաչատրյանը վաճառել էր ժամկետանց ձու: Սա նշանակում է, որ դրանից բխող մյուս բոլոր դատական հայցերը, որոնք նույն Խ. Խաչատրյանը ներկայացրել է «Ժողովուրդ» օրաթերթի դեմ՝ եւս 3.2 մլն դրամ պահանջով, պետք է մերժվեն, քանի որ սա համարվում է «Ժողովուրդ» օրաթերթի եւ Ձվերի Խաչիկի միջեւ առկա վեճի առարկան:

Մանրամասները` «Ժողովուրդ»-ի այսօրվա համարում: