Ի հակադրություն այժմյան աղավաղված երգ - երաժշտության` ժողովրդական և աշուղական երգի համերգաշար

Մեզ հայտնի դարձավ մի նախագիծ, որը ժողովրդական երգով է հանդես գալիս տարբեր մարզերում, շուտով նաև` Վրաստանում: Նախագծի մասնակիցներն են «Ժողովրդական երգիչ» նախագծից Վարդուհի Գրիգորյանը, Մասիս Հունանյանը, Եվա Եգանյանը, ինչպես նաև` համերգների կազմակերպիչ և երգիչ Գագիկ Հարությունյանը:

Mediamall.am-ը զրուցեց համերգների կազմակերպիչ և երգիչ Գագիկ Հարությունյանի հետ և փորձեց հնարավորինս շատ ինֆորմացիա իմանալ այս նախագծի մասին:

- Մի փոքր պատմե´ք նախագծի մասին:

- Դարերով մեզ հասած մեծն Կոմիտաս վարդապետի և շատ աշուղների ժողովրդական և աշուղական երգն ու երաժշտությունը բարձր աստիճանի վրա պահելու, ճիշտ, որակյալ, հայեցի երգ ու երաժշտություն մատուցելու համար, խորհրդակցվելով տարբեր արվեստագետների հետ, ես որոշեցի սկսել մի համերգաշար, որտեղ կհնչի ժողովրդական և աշուղական երգն ու երաժշտությունը: Համերգաշարը կկայանա Հայաստանի մարզերում, ինչպես նաև` Հայաստանից դուրս:

- Ովքե՞ր են համերգային խմբում ներառված, և ինչպես կազմվեց այն:

- Համերգային խմբում ներառված են «Ժողովրդական երգիչ» նախագծի երգիչ-երգչուհիներից Վարդուհի Գրիգորյանը, Մասիս Հունանյանը և Եվա Եգանյանը, ովքեր հասցրել են երիտասարդ տարիքում իրենց անզուգական կատարումներով սիրվել և ճանաչվել ժողովրդի կողմից:
Համագորձակցությունը կայացավ հոկտեմբեր ամսում: Իմանալով և ճանաչելով մեր երգիչ-երգչուհիներին անհատապես և մասնագիտորեն` առաջարկեցի համագորձակցել ինձ հետ:

- Ի՞նչ նպատակով է ստեղծվել այն:

- Քանի որ այսօր հայ իրականության մեջ շատ ենք լսում աղավաղված երգ - երաժշտություն, ու կարծես թե ժողովրդականը մոռացության է մատնվում, այդ իսկ պատճառով որոշեցինք կյանքի կոչել այս գեղեցիկ համերգաշարը:

- Ի՞նչ եք հասցրել անել, և ի՞նչ պլաններ ունեք:

- Հստակ մշակված պլաններ կան` թե´ անհատական, թե´ եռյակի հետ կապված, որոնք ուզում ենք դեռ գաղտնի պահել:

Զրուցեց Լիա Թահմազյանը