Հրաժեշտ հարսանեկան գեներալներին

Օրվա լրահոսի հերոսները արդեն մի քանի օր է ոստիկանական գեներալներն են: Սկզբում մի գեներալը նշանակվեց ոստիկանապետի խորհրդատու, հետո լուրեր տարածվեցին Աֆյանի հեռացման մասին, իսկ ավելի ուշ նաև Հունանյանը հրաժեշտ տվեց համակարգին:

Այս փոփոխությունները լրատվական դաշտում տարբեր մեկնաբանությունների տեղիք տվեցին: Ոմանք հիշեցնում էին Աֆյանի բուռն անցյալը, որ նա ծավալել էր իր՝ մինչ փոխոստիկանապետական կյանքի ընթացքում՝ բազմաթիվ անգամ միտինգավորների նկատմամբ հրամաններ տալով և անձամբ կիրառելով, ոմանք հիշեցնում էին որ ոստիկանության ամենախոցելի ծառայության՝ Ճանապարհային Ոստիկանության ուղղակի պատասխանատուն հենց Աֆյանն էր, ոմանք մտավախություններ էին հայտնում Էդիկ Բարսեղյանի՝ համակարգ վերադառնալու հետ կապված և որպես փաստարկ նշում նրա պատկառելի տարիքը: Խորքային վերլուծություն, կարծես թե, այդպես էլ չեղավ, ինչևէ այդ բացը փորձենք միասին լրացնել:

Ոստիկանական համակարգում այս տեղափոխությունները իրենց մեջ պարունակում են հստակ հաղորդագրություն: Իրողությունը այն է, որ ընդամենը 2 տարի անց ոստիկանությունում, ըստ տարիքային ցենզի, չի մնա որևէ ծառայող, ով աշխատանքային կարիերան սկսել է ԽՍՀՄ-ի տարիներին, այսինքն այս համակարգը լիարժեք կվստահվի անկախության սերունդին: Այս ամենի դրական և բացասական կողմերի մասին մենք կանդրադառնանք հետագայում, երբ ավելի պրակտիկ աշխատանքում ականատես կլինենք այդ փոփոխություններին: Այժմյան իրողության համաձայն՝ ոստիկանությունում գեներալա-ծերունական մոտեցումները հանձինս գեներալ Էդիկ Բարսեղյանի դրվեցին խորհրդատվական մակարդակի վրա, իմա՝ հարկս հարկավորաց, պատիվս պատվավորաց: Աֆյան-Հունանյան գեներալները հեռացան, իրենց հետ տանելով ավանդական սովետական միլիցիային հատկանշական մոտեցումները, եկողները, դատելով գոնե նրանց տարիքային և աշխատանքային ուղու մասով, հուսով ենք, կլինեն Հայաստանի Հանրապետություն կարգավիճակի կրողներ:

Մեծ հաշվով ոստիկանությունը՝ որպես կառույց, ոչինչ չկորցրեց, իսկ թե ինչ ձեռք կբերի և արդյոք ձեռք կբերի, դա արդեն կերևա մոտ ապագայում, եթե այս փոփոխությունները ոչ թե իմիտացիոն են, այլ ստրատեգիական և իրենց մեջ հաղորդագրություն պարունակող: Այլապես ցանկացած ոստիկանական պաշտոնյա, անկախ տարիքից ու լայն մտահորիզոնից շատ արագ՝ ընդամենը մի քանի տարի կաբինետում նստելով, կարող է վերածվել Աֆյանի և Հունանյանի…

Սարգիս Մնացականյան