Թատրոնի կոլեկտիվը թույլ չի տա, որ Նիկոլայ Ծատուրյանի նկատմամբ հաշվեհարդար իրականացվի

Օրերս հեռուստաընկերություններից մեկով եթեր հեռարձակված Նիկոլայ Ծատուրյանի հարցազրույցը, որտեղ նա քննադատել է երկրի հոգևոր և աշխարհիկ իշխանությունների գործելաոճը, զայրացրել է Կաթողիկոս Գարեգին Բ-ին, քանի որ Ծատուրյանը իր քննադատությունների թվում կաթողիկոսին համարել է սատանա:

Կաթողիկոսը զանգահարել է Սերժ Սարգսյանին և պահանջել պատժել Ծատուրյանին: Ըստ որոշ տեղեկությունների՝ Ս.Սարգսյանի աշխատակազմի ղեկավար Վիգեն Սարգսյանը հրահանգել է Մշակույթի նախարար Հասմիկ Պողոսյանին՝ պարտադրել Նիկոլայի հրաժարականը:

Տեղեկությունները ճշտելու և թատրոնում տիրող մթնոլորտի մասին MediaMall.am-ը զրուցեց Գյումրիի Վարդան Աճեմյանի անվան թատրոնի պրոդյուսեր Տիգրան Վիրաբյանի հետ:

-Պարոն Վիրաբյան, որքանո՞վ են հավաստի այն տեղեկությունները, որ Գյումրիի Վարդան Աճեմյանի անվան թատրոնի գեղարվեստական ղեկավար, ՀՀ ժողովրդական արտիստ, պրոֆեսոր Նիկոլայ Ծատուրյանը պաշտոնանկ է արվելու իշխանություններին անհաճո դիրքորոշում արտահայտելու համար:

-Անկեղծ ասած, մեր տեղեկությունները նույնպես մամուլից ստացած տեղեկություններ են, որևէ պաշտոնապես հաստատված ինֆորմացիա չկա:

-Ի՞նչ եք կարծում, մշակույթի նախարարը ինչու՞ չընդունեց Նիկոլայ Ծատուրյանին: Այդ փաստը կապ ունե՞ր հայտնի հարցազրույցում նրա արտահայտած դիրքորոշման հետ:

-Մենք ներքին համոզմունք ունենք, որ նախարար Հասմիկ Պողոսյանի և պարոն Ծատուրյանի՝ այդպես էլ չկայացած հանդիպման ժամանակ քննարկումները ծավալվելու էին ոչ թե պաշտոնանկության, այլ թատրոնի և նրա ստեղծագործական խնդիրների մասին, որովհետև կային մի քանի հարցեր, որոնք Նիկոլայ Ծատուրյանը պատրաստվում էր քննարկել նախարարի հետ: Հանդիպման պայմանավորվածությունը եղել է նախքան պարոն Ծատուրյանի հայտնի հարցազրույցը՝ Սոս Սարգսյանի թաղման արարողության ժամանակ: Այնպես որ, նման ենթադրություններ անելու պաշտոնական հիմք չկա:

-Եթե տեղեկությունները հաստատվեն, և Նիկոլայ Ծատուրյանի պաշտոնանկության գործընթաց սկսվի, թատրոնի կոլեկտիվի ինչպիսի՞ դիրքորոշում կորդեգրի:

-Թատրոնները պետական ոչ առևտրային կազմակերպություններ են, և նախարարը իրավասու չէ աշխատանքից ազատելու գեղարվեստական ղեկավարին: Գեղարվեստական ղեկավար նշանակում և ազատում են ՊՈԱԿ-ների տնօրենները: Սակայն, Աստված մի արասցե, եթե որևէ եղանակով փորձեն ազատ կարծիք արտահայտելու համար հաշվեհարդար տեսնել նրա նկատմամբ. թատրոնը, բնականաբար, կկանգնի իր գեղարվեստական ղեկավարի կողքին, որովհետև պարոն Ծատուրյանի ղեկավարության ներքո թատրոնը ապրում է իր ստեղծագործական վերելքի լավագույն տարիները: Ավելին ասեմ, Գյումրիի Վարդան Աճեմյանի անվան թատրոնը Նիկոլայ Ծատուրյանի, կարելի է ասել, հարազատ տունն է, և մարդուն հանելը իր տնից այդքան էլ հեշտ չէ: Նա խոշորագույն արվեստագետ է, որը անչափ անհրաժեշտ է հայ թատերարվեստին:

-Իսկ թատրոնի գեղարվեստական ղեկավարի անվան շուրջ ձևավորված աժիոտաժը բացասաբար չի՞ ազդում ստեղծագործական մթնոլորտի վրա:

-Թատրոնը աշխատում է իր բնականոն ընթացքով: Այս պահին Նիկոլայ Ծատուրյանը նոր ներկայացում է բեմադրում, մենք հոկտեմբերի 20-ին խաղում ենք մեր հերթական ներկայացումը: Քանի որ որևէ պաշտոնական հիմք չունենք, որ մեր գեղարվեստական ղեկավարին պաշտոնանկություն է սպառնում, մենք նորմալ աշխատում ենք, սակայն եթե նման քայլ արվի, ամեն ինչ այլ ընթացք կստանա: Նիկոլայ Ծատուրյանը հարգված և տաղանդավոր անձնավորություն է, և մենք թույլ չենք տա, որ նրա նկատմամբ հաշվեհարդար իրականացվի:

Վարուժան Բաբաջանյան