Լավ և վատ սարքած PR

Եթե դու հասարակության մեջ ունես որոշակի դիրք կամ փորձում ես այն ձեռք բերել, կամ եթե բիզնեսդ ցանկանում ես ընդլայնել, ապա շա՛տ կարևոր նախապայման է գրագետ արված PR-ը: Մեր երկրում այս ոլորտը ևս կայունացման փուլում է և նոր-նոր է սկսել արմատավորվել, այդ իսկ պատճառով հաճախ բախվում ենք սխալ կամ թերի մշակված քայլերի: Կարճ ժամանակում այն այնքան մեծ տարածում գտավ, որ շատերին թվում է` հեշտ է PR-ով զբաղվել, բայց պարզվում է` ոչ այնքան: Երբեմն այն պարզապես հակառակ արդյուքն է ցույց տալիս: 

Ինչ խոսք, կրեատիվ մտածելակերպ ոչ բոլորը կարող են ունենալ: Հենց դրա համար էլ անհրաժեշտ է այս ոլորտին ևս մեծ ուշադրություն դարձնել և կողքիդ ունենալ ճիշտ ընտրված մասնագետներ և ոչ թե ԽԾԲ-ով լցնել հասարակայնության հետ կապերի և լրատվության բաժինները:

Երեկ լրատվական դաշտը ողողվեց ԱԻՆ նախարար Արմեն Երիցյանի «հերոսական քայլով»: Ըստ պաշտոնական ինֆորմացիայի` նախարարը փրկեց ինքնասպանության փորձ կատարող 28-30 տարեկան տղայի կյանքը:

Գերազանց է, եթե իրական է: Եթե իրական չէ, ուրեմն ի՞նչ է... վատ սարքած PR:

Այն հենց այդպես էլ ընդունվեց: Մարդիկ սկսեցին մեկնաբանել, թե իբր անհաջող PR է: Անգամ շատերի մոտ վարկաբեկվեց Արմեն Երիցյան նախարարը, որը, թերևս, մինչ այդ պակաս համբավ չուներ:

Նմանօրինակ քայլերի է գնում նաև Երևանի ճանապարհային ոստիկանության պետ Արսեն Արշակյանը, երբ ժամանակ առ ժամանակ փրկում է այս կամ այն մարդու կյանքը: 

Պետք է պարզապես տեղեկացնել, որ այս մեթոդն արդեն կորցրել է իր ուժը: Պետք է այլ բաներ մտածել, կամ եթե «բարի ասպետի» դեր եք ցանկանում խաղալ, գոնե Արսեն Արշակյանի հետ փորձի փոխանակում արեք. իր մոտ դա լավ է ստացվում:

Եթե այդ դեպքերը իրականությանը համապատասխանում են, կանխավ հայցում ենք ձեր ներողամտությունը, բայց նաև տեղեկացնում ենք, որ դրանք հաճախ այնպես են լուսաբանվել, որպեսզի կոնկրետ անձի վարկանիշ բարձրացվի:

Ն.Ա.