«Կոկա Կոլա Հելլենիկ Արմենիա» ընկերության աջակցությամբ հերթական բակն է բացվել մայրաքաղաքում (ֆոտո)

Երևանի քաղաքապետի խորհրդական Արայիկ Քոթանջյանը մասնակցել է մայրաքաղաքի Կենտրոն վարչական շրջանի Կողբացու 1 ա, Մաշտոցի 16 և Խորենացու 3 շենքերի բակում Երևանի քաղաքապետարանի և «Կոկա Կոլա Հելլենիկ Արմենիա» ընկերության համատեղ ծրագրով խաղահրապարակի բացման հանդիսավոր արարողությանը: Բացմանը ներկա են գտնվել նաև Կենտրոն վարչական շրջանի ղեկավար Արա Սադոյանն ու «Կոկա Կոլա Հելլենիկ Արմենիա» ընկերության գլխավոր տնօրեն Գագիկ Դանիելյանը:

Երևանի քաղաքապետ Տարոն Մարգարյանի անունից ողջունելով ու շնորհավորելով բնակիչներին բակի կառուցման կապակցությամբ՝ քաղաքապետի խորհրդական Արայիկ Քոթանջյանը նշել է, որ սա քաղաքապետարան - մասնավոր հատված համագործակցության հերթական հաջողված օրինակներից մեկն է, որն անշուշտ շարունակություն կունենա:
Արայիկ Քոթանջյանը նաև կոչ է արել բակի բնակիչներին տիրոջ սրտացավությամբ վերաբերվել տեղակայված գույքին ու ենթակառուցվածքներին, որպեսզի խաղահրապարակը երկար ծառայի իր նպատակին:

«Կոկա Կոլա Հելլենիկ Արմենիա» ընկերության գլխավոր տնօրեն Գագիկ Դանիելյանն էլ նշել է, որ սա Երևանի քաղաքապետարանի հետ համագործակցությամբ կյանքի կոչված արդեն երրորդ բակն է, որի տեխնիկական և այլ բնույթի աշխատանքներին մեծապես աջակցել է նաև Կենտրոն վարչական շրջանի ղեկավար Արա Սադոյանը, և հավելել, որ առաջիկա տարիներին կյանքի կկոչվեն նմանատիպ համատեղ այլ ծրագրեր: Խաղահրապարակում բացի մարզասարքերից ու հարակից պարագաներից, տեղադրվել են նաև նստարաններ, կահավորվել է ֆուտբոլի դաշտ' նաև բասկետբոլ խաղալու հնարավորությամբ:

Բակի բացման հանդիսավոր արարողությանը հաջորդել են մարզական միջոցառումները: Հաղթող երեխաները «Կոկա Կոլա»-ի կողմից պարգևատրվել են մրցանակներով: