Մոնիտորինգի «պրոֆեսիոնալ» մասնակիցները կրակոցների ուղղություն չե՞ն կարող որոշել

ԵԱՀԿ թիմը հոկտեմբերի 17-ին ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկի գլխավորությամբ դիտարկման է մասնակցել շփման գծի հարավային հատվածում, երբ ադրբեջանական կողմից հնչել էին կրակոցներ: Այս խնդրին ԵԱՀԿ-ը անդրադարձել է առանջին հայտարարությամբ, որում ԵԱՀԿ Մինսկի խմբի համանախագահներն ու ԵԱՀԿ գործող նախագահի անձնական ներկայացուցիչը նշում են, թե «անհնար է եղել ճշտել, թե որտեղից են եղել կրակոցները»:

Անվտանգության ու ապահովության նկատառումներից ելնելով` ԵԱՀԿ գործող նախագահի անձնական ներկայացուցիչը դադարեցրել է մոնիտորինգը: Միեւնույն ժամանակ, հայտարարությամբ նշվում է, թե ԵԱՀԿ Մինսկի խմբի համանախագահները տեղյակ են, որ մոնիտորինգում ներգրավվածները բարձր պրոֆեսիոնալիզմ են ցուցադրում: «Կարծում ենք, որ այդ բացառություն հանդիսացող եւ ափսոսալի միջադեպը խարխլում է այդ մասնագետների, անձնական ներկայացուցչի ու նրա թիմի աշխատանքը, ինչպես նաեւ հակասում 1994-ի մայիսի զինադադարի պայմանագրին», ասվում է ԵԱՀԿ պաշտոնական կայքում տեղադրված հայտարարությամբ:

ԵԱՀԿ Մինսկի խմբի համանախագահները կոչ են արել համապատասխան մարմիններինՙ հետաքննել միջադեպը «մանրամասնորեն եւ անկողմնակալ»:

Այս ամենի համատեքստում նախ պետք է ափսոսանք հայտնել, որ ԵԱՀԿ Մինսկի խումբը ցայսօր այնպիսի մասնագետների է ուղարկում շփման գծի դիտարկման, որոնք չեն էլ կարողանում որոշել, թե որտեղից են իրենց վրա կրակոցներ հնչում: Մյուս կողմից, պետք է նաեւ ԵԱՀԿ Մինսկի խմբի թղթաբանությամբ զբաղվողներին գոնե հիշեցնել, որ քանիցս հենց Ադրբեջանն է, որ թույլ չի տվել դիտարկումների ժամանակ մոտենալ շփման գծին, իսկ միջադեպերի հետաքննության հարցն էլ առ այսօր առկախված է նույն ադրբեջանական մոտեցման պատճառով:

Որ ԵԱՀԿ Մինսկի խումբը փորձում է հավասարության նշան դնել կողմերի միջեւ, բնավ նորություն չէ, սակայն երբ ակնհայտ հանգամանքները մեկնաբանվում են այնպես, կարծես թե ինչ-որ բան հնարավոր չի եղել` միայն կարող է նշանակել թողտվություն, ամենաթողություն առանց այդ էլ սադրանքների հարցում տարբեր քայլեր հեղինակելու պակաս չունեցող Ադրբեջանի համար:

Մանրամասները` «Ազգ»-ի ասյօրվա համարում: