«Ոչ մի հարց չեմ պարզաբանելու». Արմինկան չի ցանկանում մեկնաբանել իր մասին շրջանառվող լուրերը

Վերջերս մամուլում տարածվեցին տեղեկություններ հայտնի մարդկանց աղանդավոր լինելու մասին: Շատերը համարեցին սա մարդու իրավունքների խախտում և ազատությունների սահմանափակում, մյուսները աղանդավոր հանրային դեմքերին համարեցին «մոլորյալ գառնուկներ»:

Հարցը այլ հարթակ տեղափոխվեց, երբ հրապարակվեց «Ռեմա» աղանդի ավագ հովիվ Կարեն Խաչատրյանի գաղտնի զրույցը երգչուհի Արմինկայի` «Ռեմա» աղանդին հարելու մասին: Այս դեպքում հարց է առաջանում. եթե Արմինկան աղանդավոր է, ապա ինչու՞ է վերջերս իր որդուն` Ալեքսին, մկրտել Սուրբ Հովհաննես Հայ Առաքելական եկեղեցում: Նրան և մյուս հայտնի անձանց աղանդավորական կառույցների հետ կապելը արդյո՞ք զուտ PR չէ վերջիններիս կողմից վարկանիշը բարձրացնելու և նոր մոլորյալներ ներգրավելու համար:

Մենք հավատարիմ ենք մնացել հավասար լուսաբանման մեր սկզբունքին և նմանատիպ տեղեկություններին զուգահեռ ներկայացրել ենք նաև այն անձանց տեսակետները, ում վերաբերյալ նմանատիպ ինֆորմացիոն արտահոսք է եղել: Նույնը փորձեցինք անել նաև Արմինկայի պարագայում: Վերջին քննարկումների ֆոնին երգչուհուց հարցազրույց վերցնելու և աղմկահարույց երևույթի մասին պարզաբանումներ ստանալու նպատակով MediaMall.am-ի թղթակիցը կապ հաստատեց Արմինկայի հետ, սակայն վերջինս պատասխանեց.

-Ես հարցազրույց չեմ տալիս և ոչ մի հարց չեմ պարզաբանելու:

Դավիթ Պոլոյան