Վարդան Պետրոսյանը գիտակցության է եկել

Հոկտեմբերի 20-ին տեղի ունեցած վթարի հետևանքով տուժած դերասան Վարդան Պետրոսյանը գիտակցության է եկել: Այս մասին Lurer.com-ի հետ զրույցում հայտնեց «Էրեբունի» Բ/Կ-ի մամուլի քարտուղար Շուշան Հունանյանը:

«Առողջական վիճակն այս պահին կայուն է, անջատել են արհեստական շնչառական ապարատից: Պետրոսյանը դեռ մի քանի օր կգտնվի վերակենդանացման բաժանմունքում»,-ասաց նա:

Հարցին` կյանքին վտանգ սպառնում է, թե` ոչ, Հունանյանն ասաց, որ վիճակը շատ ավելի լավ է:

Հիշեցնենք, որ հոկտեմբերի 20-ին խոշոր ավտովթար էր տեղի ունեցել Կոտայքի մարզում: Ժամը 21:20-ի սահմաններում Եղվարդ-Երևան ավտոճանապարհի 32-րդ կմ հատվածում բախվել են BMW մակնիշի 04 ՍԼ 920 համարանիշի և Վազ 2121 մակնիշի 870 ՕԼ 64 համարանիշի ավտոմեքենաները:

Վթարի հետևանքով 6 հոգի մարմնական վնասվածքներով տեղափոխվել է տարբեր հիվանդանոցներ: Վիրավորներից երկուսն ավելի ուշ մահացել են: