ԱԳ նախարարը հանդիպեց ԵԽ մարդու իրավունքների հանձնակատարին

Հոկտեմբերի 22-ին ԱԳ նախարար Էդվարդ Նալբանդյանը հանդիպեց Եվրոպայի խորհրդի Մարդու իրավունքների հանձնակատար Նիլս Մուիժնիկսին, ով Երևան է ժամանել «Պայքար Եվրոպայում խտրականության, այլատյացության և անհանդուրժողականության դեմ» բարձրաստիճան խորհրդաժողովին մասնակցելու նպատակով։

Ողջունելով հյուրին՝ նախարար Նալբանդյանը կարևորեց մարդու իրավունքների հանձնակատարի դերը ԵԽ անդամ երկրներում մարդու իրավունքների առաջմղման գործում։

Շնորհակալություն հայտնելով ընդունելության համար՝ Նիլս Մուիժնիկսը նշեց, որ Եվրոպայում Հայաստանի նախագահությունը բավականին հաջող է ընթանում և դրա վկայություններից է «Պայքար Եվրոպայում խտրականության, այլատյացության և անհանդուրժողականության դեմ» խորհրդաժողովի բարձր մակարդակով կազմակերպումը։

Նախարար Նալբանդյանն ընդգծեց, որ խորհրդաժողովի խորագիրը պատահական չէ ընտրված, քանի որ այդ խնդիրները այսօր ոչ միայն այժմէական են, այլև լուրջ մարտահրավեր են միջազգային հանրության համար։ Այդ համատեքստում նախարար Նալբանդյանն ասաց. «Չնայած Եվրոպայի խորհրդի և միջազգային այլ կազմակերպությունների կողմից այլատյացության, խտրականության և ատելության դեմ տարվող պայքարին, այսօր անգամ ԵԽ կազմում դեռևս կան երկրներ, որոնք ոչ միայն քարոզում են այլատյացությունը, այլև առաջնորդվում են այդ գաղափարախոսությամբ իրենց գործունեության մեջ՝ ոչ միայն անտեսելով թե ԵԽ-ի, և թե այլ հեղինակավոր միջազգային կառույցների քննադատությունը, այլև հանդիմանելով և հակադրվելով դրանց, հռչակում են իրենց հանդուրժողականության կենտրոն, որից աշխարհը պետք է օրինակ վերցնի»։

Նախարար Նալբանդյանն ու հանձնակատար Մուիժնիկսը քննարկեցին Հայաստանում մարդու իրավունքների պաշտպանության մակարդակի բարձրացման ուղղությամբ ձեռնարկվող շարունակական քայլերը։

Հյուրի խնդրանքով Հայաստանի արտաքին քաղաքական գերատեսչության ղեկավարն անդրադարձավ hայրենիքում ապաստանած սիրիահայերին օժանդակելու նպատակով իրականացվող քայլերին։