«Լոռու մարզպետը լոռեցի գրողներին ակնհայտորեն ուղորդել է քվեարկել Հովեյանի օգտին». Սամվել Բեգլարյան

Լևոն Անանյանի անժամանակ մահվանից հետո Հայաստանի գրողների միությունը համագումար հրավիրեց և ընտրեց միության նոր նախագահ: Ինչպես արդեն տեղեկացրել ենք, վիճաբանություններով և սկանդալներով լի համագումարը ՀԳՄ նախագահ ընտրեց գրող Էդուարդ Միլիտոնյանին: Ինչու էին գրողները այդքան բորբոքված, ինչպիսի ճնշումներ են եղել միության անդամների վրա քվեարկության ընթացքում... պարզաբանումներ ստանալու համար MediaMall.am-ը դիմեց ՀԳՄ Տավուշի մարզային բաժանմունքի նախագահ, արձակագիր և դրամատուրգ Սամվել Բեգլարյանին: 

Պարոն Բեգլարյան, ի՞նչ եք կարծում, ՀԳՄ համագումարի ընթացքում ինչո՞ւ էին կրքերը աննախադեպ շիկացած:

Ստեղծագործողները միշտ էլ ունենում են էմոցիոնալ պոռթկումներ: Շուտով կլինի նաև Կոմպոզիտորների միության համագումարը: Չեմ կարծում, որ այն հարթ կանցնի: Ասեմ նաև, որ որոշ մարզպետներ փորձել էին ուղորդել իրենց մարզերի գրողներին, ինչը լրացուցիչ լարվածություն էր մտցրել: Ուղղակի Էդուարդ Միլիտոնյանը, որպես վաստակ ունեցող մարդ, ստացավ ձայների ակնհայտ առավելություն: Անգամ սփյուռքի քվեարկողների թվաքանակը եթե հանենք, Միլիտոնյանի առավելությունն ակնհայտ է:

Իսկ ո՞ւմ օգտին են աշխատել մարզպետները:

Պարոն Միլիտոնյանի դժգոհությունից երևում էր, որ նրանք Հովեյանի օգտին են աշխատել:

Կոնկրետ օրինակներ կնշե՞ք:

Լոռեցի գրողները բացահայտորեն պաշտպանում էին Հովիկ Հովեյանին: Մարզպետի աջակցությունը ակնհայտ էր: Կարծեմ Արթուր Նալբանդյանն ու Հովիկ Հովեյանը բարեկամական կապեր ունեն կամ ընկերներ են: Ասեմ, որ լոռեցի մեր գրչընկերները իրենց հակադրությունը Միլիտոնյանին ճղճիմ, անընդունելի ձևերով չէին անում: Մարդիկ պարզապես բացահայտ դեմ էին արտահայտվում նրա թեկնածությանը և քարոզում էին հօգուտ Հովեյանի:

Դուք ինքներդ Գրողների միության Տավուշի մարզային կառույցի ղեկավարն եք: Մարզպետ Արմեն Ղուլարյանի կողմից Ձեզ այս կամ այն թեկնածուի օգտին ուղորդելու կամ ճնշման փորձեր եղե՞լ են:

Տավուշի մարզպետը, բարեբախտաբար կամ դժբախտաբար, այդ ժամանակ գտնվում էր Ֆրանսիայում, բայց մեր համատեղ աշխատանքի ընթացքում պարոն Ղուլարյանը համոզվել է, որ անհնար է ինձ որևէ հարցում, ճնշել և չի էլ փորձում: Գուցե եղել է ցանկություն, բայց ոչ ասել է, ոչ էլ փորձել է, որովհետև գիտի, որ դա ինձ վրա չի ազդում: Ես ունեմ իմ կարծիքը և ընտրել եմ նրան, ում ցանկացել եմ:

Համագումարի ընթացքում միջադեպ եղավ Ձեր և Աշոտ Խաչատրյանի միջև. դուք նրան անվանեցիք KГБ-ի գործակալ: Ի՞նչ հիմքերով դուք այդպիսի հայտարարություն արեցիք:

Այդ մարդը իրեն թույլ տվեց հարբած վիճակում մտնել համագումարի դահլիճ և մատնացույց անելով Ավիկ Իսահակյանին՝ ասաց՝ ո՞վ է ընտրել սրան: Որպեսզի սադրանքը չշարունակվի, և Իսահակյանը իրեն վատ չզգա, ես մոտեցա և ասացի, որ ես եմ առաջարկել նրան, և խնդրեցի, որ Աշոտ Խաչատրյանը դուրս գա և աղմուկ չսարքի: Դուրս եկավ, հինգ րոպե հետո նորից ներս մտավ և սկսեց Ավիկ Իսահակյանի հասցեին սխալ արտահայտություններ անել: Անընդհատ անձին էր կպչում` փոխանակ որևէ կանոնադրության խախտում մատնացույց աներ: Ես մոտեցա և ասացի՝ դու КГБ-ի գործակա՞լ ես. քո գործողությունները նրանց գործելաոճին է նման՝ իհարկե ի նկատի ունենալով սովետական կառույցին: Այդքան բան:

Վարուժան Բաբաջանյան