Հովիկ Աբրահամյանը «փուռը տվեց» Սերժ Սարգսյանին. «ժառանգորդ» օպերացիայի նողկալի ենթատեքստերը

ԱԺ-ի հերթական նիստը, կարելի է ասել, ջախջախեց եվրոպական գործընկերների հետ ինչ-որ ձևաչափով քաղաքակիրթ հարաբերություններ պահպանելու վերջին հնարավորությունները: Եվրոպայում ընդունված է նախագահներին տալ անցանկալի հարցեր. հայտնի են դեպքեր, որ եվրոպացիներն իրենց ղեկավարների դեմ անհամաձայնությունն արտահայտել են այնպիսի միջոցներով, որ եթե այդպիսի բան կատարվեր Հայաստանում՝ իշխանությունների ֆանտազիան չէր բավարարի նրանց պատժելու համար: Իսկ ԵԽԽՎ-ում Զարուհի Փոստանջյանի կողմից հնչեցված աղմկահարույց հարցից հետո Սերժ Սարգսյանի՝ հանդուրժող և ցանկացած հարցի պատրաստ առաջնորդի կերպար հյուսելու փոխարեն, վրեժխնդրության ուղիների փնտրտուք սկսվեց: Այդ «սուրբ առաքելությունն» իր վրա վերցրեց ԱԺ նախագահ Հովիկ Աբրահամյանը, ով կարգադրություն է ստորագրել, որով սահմանվում են ՀՀ ԱԺ պատվիրակությունների տեղերի բաշխման սահմանաքանակը միջազգային խորհրդարանական կազմակերպություններում: Այս կարգադրությունից պարզ է դառնում, որ ԱԺ նախագահը «Ժառանգություն» կուսակցությանը զրկել է ԵԽԽՎ-ում հանդես գալու հնարավորությունից:

Ընդ որում, ՀՀԿ-ականներն այս որոշումը ընդունել են ծափահարություններով՝ իրենք էլ չհասկանալով, թե ինչպես է ԱԺ նախագահը իր մանրախնդիր քայլերով «փուռը տվել» սեփական կուսակցութան առաջնորդին: Ստացվում է, որ Սերժ Սարգսյանի դեմ սեփական կուսակիցները, կամա թե ակամա, դավադրություն են կազմակերպել:

Հովիկ Արգամիչի` դեռևս նախորդ հայտարարությունից հետո Փոստանջյանը ԵԽԽՎ համապատասխան հանձնաժողովից պարզաբանումներ էր ստացել, որ Աբրահամյանն իրավասու չէ փոփոխություններ կատարել հայկական պատվիրակության կազմում, որովհետև պատվիրակության կազմն արդեն հաստատված է, և եթե ԱԺ նախագահը փորձի խոչընդոտել ընդդիմադիր պատգամավորի գործունեությունը, ապա կլինի արձագանք հենց ԵԽ-ից։ Իսկ մեր ղեկավարությունը շատ լավ գիտի, թե ինչ հետևանքներ են ունենում նմանատիպ արձագանքները՝ հատկապես եվրոպական կառույցների հետ հեղհեղուկ հարաբերությունների ֆոնին: Մինչդեռ կարելի էր գրագետ քաղաքականություն վարելու դեպքում ստեղծել ցանկացած քննադատության հանդեպ զուսպ վերաբերմունք ունեցող առաջնորդի կերպար՝ արտաքին աշխարհի համար: Զարուհու դեմ հարձակումների ֆոնին անգամ Սերժ Սարգսյանի վարկանիշը սկսել էր բարձրանալ, սակայն ԱԺ նախագահն «արջի ծառայություն» մատուցեց նրան:

Մինչդեռ մեր իշխանությունները չհասկացան այդ «արջի ծառայության» հնարավոր հետևանքները և ժամանակին չկանգնեցրին այդ գործընթացը: Փոստանջյանի հարցն ընդամենը մեկ փոքրիկ հայտարարության թեմա էր. իշխանությունները պարզապես կարող էին հայտարարել, որ հարգում են ցանկացած ՀՀ քաղաքացու ազատ արտահայտվելու իրավունքը, սակայն կոչ են անում միջազգային ամբիոններից կարծիքներ հնչեցնելիս լինել առավել կոռեկտ և դուրս չգալ էթիկայի սահմաններից: Սրանով Հայաստանի վարկանիշն էականորեն կբարձրանար, եվրոպական կառույցների հետ այդքան բաղձալի համագործակցությունն առավել դյուրին կլիներ:

Իսկ այժմ մեր երկրին ծանր օրեր են սպասվում: Հազիվ եվրոպացիներից պոկված անորոշ խոստումները՝ որևէ անբովանդակ փաստաթուղթ ընդունելու, ի դերև լինելու վտանգի առաջ են:

Հերթական անգամ անձնական վրեժխնդրությունը գերադասվեց պետության շահերից:

Իսկ միգուցե իր թիմակիցներից ոմանց պետք է Սերժ Սարգսյանի հենց այդպիսի կերպարը՝ միջազգային կառույցների համար: Այդ մասին գործող նախագահը մտածելու ժամանակ դեռ շատ ունի: Առջևում կառավարման դաժան և ինտրիգային տարիներն են՝ «ժառանգորդ» օպերացիայի բոլոր նողկալի դրսևորումներով...