Այսօր պարուսույց Հովսեփ Շամամյանի ծննդյան օրն է

Պարուսույց Հովսեփ Շամամյանը ծնվել է 1926 թ. հոկտեմբերի 26-ին, Վանեցու ընտանիքում:

1933-44թթ. սովորել է պարարվեստի ուսումնարանում: 13 տարեկան հասակում մասնակցել է Մոսկվայում կայացած Հայաստանի գրականության և արվեստի առաջին տասնօրյակին, որտեղ մեծ թատրոնի բեմի վրա կատրել է պար` Արամ Խաչատրյանի «Երջանկություն» բալետից: 1944-51 թթ, որպես կամավոր, ծառայել է սովետական բանակում: Գնդում իրեն դրսևորել է որպես պարերի հմուտ բեմադրող, ինչպես նաև` լավագույն կատարող: Պարգևատրվել է «Գերմանիայի դեմ հաղթանակի համար» մեդալով, Սպայի տանը զինվորական պարային համույթ ստեղծելու համար պատվոգրերով և այլն:

1955-60թթ. սովորել է Երևանի մանկավարժական ինստիտուտի պատմության ֆակուլտետում: Ավելի քան մեկ տարի դասավանդել է ակումբագրադարանային տեխնիկումում, ապա` երաժշտական գիշերօթիկ դպրոցում:

1972-85 թթ. բեղմնավոր աշխատանք է կատարել Երևանի Սունդուկյանի, Պարոնյանի անվան թատրոնների ստուդիաներում, ինչպես նաև` Պատանի հանդիսատեսի թատրոնում: Իր անընդմեջ աշխատանքային գործունեության 70 տարիների ընթացքում, որից 30-ը` պիոներ-դպրոցականների պալատում, ստեղծել է մի շարք համույթներ` «Բարեկամություն» (1964թ.), «Զարթոնք» «Արևիկ», «Ժպիտ», «Երջանիկ մանկություն», «Զորավար Անդրանիկ», «Գարուն», «Երիտասարդություն» և այլն: Այս համույթներից այսօր գործում է «Բարեկամություն» համույթը, որը անվանափոխվել է վարպետի մահից հետո և իր պատվին կոչվում է Հովսեփ Շամամյանի անվան «Բարեկամություն» անսամբլ:

Մահացել է 2004թ. նոյեմբերի 21-ին, Երևանում:

avproduction.am