Վրաստանում մեկնարկել են նախագահական ընտրությունները

Այսօր` հոկտեմբերի 27-ին, Վրաստանում մեկնարկել են նախագահական ընտրությունները, որոնք ամփոփիչ եզրագիծ կքաշեն Սաակաշվիլիի 8-ամյա կառավարության համար: Ընդ որում Վրաստանի վարչապետ Բիձինա Իվանիշվիլին խոստացել է լքել իր պաշտոնը նոր նախագահի երդմնակալությունից հետո: Սրանով երկրում փաստացիորեն ավարտվում է խարիզմատիկ քաղաքական գործիչների դարաշրջանը: Նախագահի պաշտոնի համար Վրաստանի ԿԸՀ-ն գրանցել է աննախադեպ թվով թեկնածուների՝ 23: Չնայած նախօրեին նրանցից մեկը՝ Ակակի Ասատիանիան, հանել է իր թեկնածությունը խորհրդարանի նախկին խոսնակ Նինո Բուրջանաձեի օգտին, սակայն նրա անունը մնալու է քվեաթերթիկների վրա:

Նախագահի թեկնածուների թվում ֆավորիտ է համարվում իշխող «Վրացական երազանք» կուսակցության կողմից առաջադրված Գեորգի Մարգվելաշվիլին է: Նա ունի վարչապետ Իվանիշվիլիի աջակցությունը, ինչն էլ համարվում է նրա հաջողության հիմնական երաշխիքը: Այս թեկնածուի հաղթանակը գրեթե կանխորոշված է`ըստ անցկացված բոլոր հարցումների: Համաձայն այդ հարցումների՝ Մարգվելաշվիլին հաղթանակ կտանի հենց առաջին փուլում՝ 57% ձայներ ստանալով: Սակայն 2-րդ փուլի հավանականությունը, ամեն դեպքում, չի բացառվում: 2-րդ փուլ անցնող, Մարգվելաշվիլիի հիմնական հակառակորդ համարվող թեկնածուն Սաակաշվիլիի ղեկավարած ընդդիմադիր «Միասնական ազգային շարժում» կուսակցության կողմից առաջադրված Դավիդ Բաքրաձեն է: 

Եվ նախագահի քիչ թե շատ իրական հնարավորություն ունեցող թեկնածուների եռյակը եզրափակում է խորհրդարանի նախկին խոսնակ Նինո Բուրջանաձեն, ում հաղթանակի հնարավորությունը գնահատվում է 7%: 

Նախագահի պաշտոնի համար պայքարում են նաև Կոմունիստական կուսակցության առաջնորդ Նուգզար Ավալիանին, լեյբորիստ Շալվա Նաթելաշվիլին, ինչպես նաև Քրիստոնեա-դեմոկրատական կուսակցության նախագահ Գեորգի Թարգամաձեն:

Ընտրատեղամասերը բացվել են առավոտյան ժամը 08.00-ից և փակվելու են 20.00-ին: