Մարգվելաշվիլին շարունակում է հաղթել Վրաստանում քվեաթերթիկների 97%-ը հաշվելուց հետո

Վրաստանում «Վրացական երազանք» իշխող կուսակցության նախագահի թեկնածու Գեորգի Մարգվելաշվիլին փաստացիորեն հաղթանակ է տանում նախագահական ընտրությունների առաջին փուլում` քվեաթերթիկների 97%-ը հաշվելուց հետո: 

Համաձայն 3164 ընտրատեղեմասերից ստացված տվյալների` Մարգվելաշվիլին շարունակում է հաղթել ձայների 62.1% առավելությամբ: «Միասնական ազգային շարժում» կուսակցության թեկնածու Դավիդ Բաքրաձեն հավաքում է 21.75%-ը, իսկ երրորդ տեղում է խորհրդարանի նախկին խոսնակ Նինո Բուրջանաձեն` 10.19%-ով: 

Լեյբորիստական կուսակցության նախագահ Շալվա Նաթելաշվիլին հավաքել է 2.87%, իսկ քրիստոնեա-դեմոկրատականների առաջնորդ Գեորգի Թարգամաձեն` 1.07%: Մնացյալ 18 թեկնածուները չեն հաղթահարել նույնիսկ 1%-ի շեմը:

Համաձայն Վրաստանի ընտրական օրենսգրքի` հաղթող է ճանաչվում այն թեկնածուն, ով հավաքել է ընտրողների ձայների 50%-ը` գումարած մեկ ձայն: Այսինքն` ինչպիսին էլ որ լինեն չհաշվված տեղամասերի քվեարկության արդյունքները, Մարգվելաշվիլին համարվում է հաղթանակած թեկնածու: