18 000 դրամ նպաստը սոցիալապես ապահով մարդիկ էին ստանում. Տիգրան Սարգսյան

Վարչապետ Տիգրան Սարգսյանն այսօր Ազգային ժողովում ներկայացրեց «Հայաստանի Հանրապետության 2014թ. պետական բյուջեի մասին» ՀՀ օրենքի նախագիծը:

Բյուջեի նախագիծը քննարկվելու է Ազգային ժողովի բոլոր հանձնաժողովներում:

Տիգրան Սարգսյանը, ներկայացնելով նախագիծը, ասաց, որ առաջին անգամ է այս մոտեցումով բյուջե ներկայացվում, և խնդրեց շատ խիստ չդատել:

Վարչապետի խոսքերով` երեք տարի է անհրաժեշտ լինելու ծրագրային բյուջետավորման համակարգ ներդնելու համար:

Կառավարության ղեկավարը նշեց, որ ուշադրության կենտրոնում են լինելու նաև բազմազավակ ընտանիքները:

Տիգրան Սարգսյանն անդրադարձավ նաև գործազրկության նպաստներին: Ըստ վարչապետի` ուսումնասիրությունները ցույց են տվել, որ 94% դեպքերում նպաստը ստանում էին ապահովված մարդիկ:

«18 000 դրամ նպաստը սոցիալապես ապահով մարդիկ էին ստանում, ովքեր աշխատանք որոնելու փորձ չէին անում: Սա մեր երկրի համար արդյունավետ չէ, շատ երկրներ այսպիսի համակարգ չունեն: Այսուհետ համապատասխան ենթակառուցվածքների աշխատողների միջոցով պետք է բացահայտեն աշխատանք որոնողներին և նրանց` ինչպես առարկայական, այնպես էլ` ֆինանսական օգնություն ցուցաբերեն»,- ասաց Տիգրան Սարգսյանը:

Վերջինս նշեց, որ հունվարի 1-ից կենսաթոշակների բարձրացման արդյունքում 32 հազար մարդ աղքատության շեմից դուրս կգա: